Diyarname
Serokê Giştî yê CHP'ê Deniz Baykal îro di kurultaya xwe de careke din hat hilbijartin. Wî gotinên balkêş jî kirin.

32'yemîn Komcivîna CHP'ê îro li dar ket. Ji 1231 delegeyî 1105 delege beşdarî komcivînê bûn û di encamê de Serokê Giştî yê CHP'ê Deniz Baykal bi dengên 1021 delegeyî careke din ji bo serokatiya CHP'ê hat hilbijartin.

Deniz Baykalê ku heta niha xeteke neteweperest a tirk dimeşand di vê komcivînê de tiştên berevajî vê xeta xwe gotin. Baykal ku heta niha li dijberî pirsgirêka kurd polîtîka dimeşand, piştgirî dida operasyona derveyî sînor, ji DTP'ê re digot, "Berdevkê terorê" di vê komcivînê de diyar kir ku pirsgirêka kurd di nav meseleyên bingehîn ên Tirkiyeyê de ye û wiha berdewam kir: "Komara Tirkiyeyê ne dewletekî nijadê ye. Ne dewletekî xwînbira ye." Baykal got ku dewlet ê gel, ê mirovan e, ne hewceye dewlet ji nû ve mirovan nasnîf bike. Dewlet nasnameya etnîkî nabîne, divê lê nenêre jî. Di vê xalê de divê kor be. Hurmetê nişan bide. Divê her kesî wekî bira bibîne."

Baykal got ku "Divê her kes xwedî weşanê be, televîzyona xwe ava bike, zimanê dayika xwe bi zarokên xwe bide hîndikin" û wiha domand: "Divê di siyasetê de teror nîn be. Teror ne rêbaza siyasetê ye. Şîdet şîdetê gur dike. Divê em li dijî terorê derên. Em baş dizanin ku dibe ku ol, mezheb, koka me ya etnîkî cihê be lê hiqûqa me yek e. Li ser vê axê ne kurd, ne elewî kêmnetew in, ew kok in. Rê ev e. Emê komarê, laîkiyê nekin qurban. Emê hemû pirsgirêkên hemwelatiyên me yên esil kurd çareser bikin. Emê wan deynên ser serê xwe. Emê wan wekî birayê xwe bibînin. Lê emê dest nedin cudaxwazî, emê prîmê nedin terorê."