QAMIŞLO
Di 20’ê Tîrmehê de, 4'emîn Pêşangeha Pirtûkan a Şehîd Herekol li hola Zana ya li bajarê Qamişlo bi diruşma "Bixwîne, xwe nas bike" dest pê kir û 24'ê mehê bi dawî bû.

Ji ber sedemê vîrusa koronayê pêşangeh rojek berî dîroka xwe bi dawî bû.  Pêşangeh ji aliyê Desteya Rêveberiya Rojava ve hate organîzekirin.

Vane hin notên ji pêşangehê:

- 39 weşanxane beşdarî pêşangehê bûn. Weşanên Şilêr, Ava, Neqiş, Meda, saziyên wekî HRRK (Hevgirtina Rewşenbîrên Rojavayê Kurdistanê), YNK-S( Yekîtiya Nivîskarên Kurd-Sûriya) jî di nav de bû.

- Weşanxaneya Şilêr di sala 2017'an de li Rojava hatiye avakirin. Ew bi li dor 200 pirtûkî beşdarî pêşangehê bû. Li dor 30 pirtûkên nû ku li bendê bûn wan jî bînin lê ji ber hin pirsgirêkan ew negihan pêşangehê. Endamê Weşanxaneya Şilêr Selah Yûsiv li ser vê wisa gotiye: "Hin pirsgirêkên teknîkî di çapê de bandorek neyênî li weşanxaneyê kir. Bi sedema berbelavbûna pandemiya Koronavîrusê li herêmên derdor û pêkanîna Rêveberiya Xweser a tedbîrên pêşîlêgirtinê yên girtina tevahî dergehên sînor bi başûrê Kurdistanê re."

Şilêr pirtûkên cur bi cur in, siyasî, civakî, wêje, çîrok, roman, helbest û pirtûkên dîrokî ku bi zimanên kurdî, erebî, ingilîzî û tirkî bûn beşdar bû.

- Weşanxaneya Ava par li Rojava hatiye avakirin û wekî weşanxaneyeke serbixwe dixwaze pirtûkên nivîskarên kurd ê li parçeyên din çap bûne bigihîne Rojava. Avayê dest bi çapkirina pirtûkên nivîskarê malpera me Helîm Yûsiv kirine. Avayê pêşî romana Yûsiv "Firîna Bi Baskên Şikestî" çap kir û yên din jî dê çap bike. Ava jî bi pirtûkên xwe li pêşangehê bû.

- Weşanên Neqiş hê îsal li Qamişlo hatiye avakirin. Heta niha 6 berhemên wan ên wêjeyî çap bûne, ew bi pirtûkên xwe li pêşangehê bûn.

Endamê Weşanxaneya Neqiş Abdullah Şêxo li ser pirsgirêkên çapkirina pirtûkan ên weşanxaneya wan wisa dibêje; "Hin astengî der barê çapkirinê de derketin. Li herêmên me asta çapkirina guncaw bi pêş neketiye. Ji lew re neçar dimînin pirtûkan li Başûr, Bakur an jî Rojhilatê Kurdistanê çap bikin. Ji ber çapxaneyên li wir baş in û buhayên pirtûkan guncaw in. Ji lew re hêvî dikin ku asta çapkirinê li Bakur û Rojhilatê Sûriyê jî baş be."

- HRRK'ê jî li pêşangehê standek vekir. Gelek nivîskaran li standa HRRK'ê pirtûkên xwe îmze kirin.

- Yekîtiya Nivîskarên Kurd-Sûriya jî li pêşangehê stand vekir.

- Bi rewşa aboriya Rojava re jî eleqedar, di pêşangehê de buhaya pirtûkan zêde hat dîtin. Di vî warî de Komîteya Amadekar gavek avêt: Komîteyê wekî alîkarî li xwendevanên pirtûkan kertên bi nirxê panzdeh hezar lîreyên sûrî belav kirin ku pirtûkan bikirin.

- Di pêşangehê de hin gotûbêj û panel bi kurdî, erebî li dar ketin, hin agahên muzîkê jî çêbûn.

- Di beşek de Beşa Pirtûkên Zarokan jî hat vekirin.

- Komîteya Amadekar di merasima girtina pêşangehê de wêneya Şehîd Herekol radestî dayîka wî kir. 

- Komîteyê pêşniyar kir ku rêveberî karê çapkirina pirtûkên sê nivîskaran, nivîskar Salih Heydo, Xidir El-Hemadî û Konê Reş bigire ser xwe.

Di çêkirina vê nûçeyê de me ji nûçeyên ANHA, hesabên civakî yên saziyan û çavdêriyên hin hevalên me sûde girt

**

Nûçeyê Eleqedar:

- Pêşangeha Pirtûkan rojek leztir hat girtin 

- Li Qamişlo eleqeya ji bo pêşangeha pirtûkan baş e 

- Li Qamişlo Pêşangeha Pirtûkan vebû 

**

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.