Diyarname

Li Almanyayê îro hilbijartina ji bo Bundestagê (Meclisa Federal) çêbû û di encamê de dê Şansolye jî diyar bibe. Piştî sindoq hatin girtin di anketan de CDU/CSU û SPD sedî 25-25 derketin lê ZDF dibêjen ku SPD bi sedî 26'ê dengan li pêş e. Dengê Partiya Keskan li dor sedî 15 dixuyin.

Piştî desthilatdariya 16 salan Şansolyeya Almanyayê Angela Merkel biryar dabû ku vî karî nedomîne. Ji bo vê jî girîng bû ku dê kîjan partî bi ser bikeve û kî bikeve cihê wê. Li ser navê Partiya Yekîtiya Xiristiyaan (CDU/CSU) Armin Laschet berendam bû. Li ser navê  Partiya Sosyal Demakrotan (SPD) Olaf Scholz berendam bû. Li ser navê Partiya Keskan jî Annalena Baerbock berendam bû. Ev her sê partî li pêş dixuyan. Li Almanyayê 60 mîlyon û 400 hezar hilbijêr hene û berêvarkî dengdayîn temam bû; encamên ne fermî hatin belavkirin. Di anketan de her du partiyên pêşî sedî 25-25 dixuyan lê kanala ZDF'ê encamek din eşkere kir. Li gor kanalê SPD bi sedî 26 li pêş e, CDU/CSU di sedî 24'an de ye. Di Meclisa Federal (Bundestage) de 756 kursî hene. Li gor ZDF'ê partiyan ev kursî bi dest xistine:

- SPD:  215 kursî

- CDU/CSU: 198 kursî

- Partiya Keskan: 120 kursî

- FDP (Partiya Demokratên Hur): 99 kursî

- Partiya Rastgirên Radîkal  (AfD): 89 kursî

- Partiya Çep (Die Linke): 41 kursî

Piştî anketên pêşîn li eniya SPD'ê goş hebû. Sekreterê Gşitî yê SPD'ê Lars Klingbeil li navenda giştî eşkere kir ku eşkereye SPD bi ser ketiye, emê hikumetê ava bikin.
Ji bilî ZDF saziyên din jî encaman belav dikin. Di hin encaman de dengên SPD 25.7, dengên CDU/CSU sedî 24.5 dixuyin.

Scholz: Hilbijêr dixwazin ez bibim şansolye

Li aliyê din berendamê serokwezîrî yê SPD'ê Olaf Scholz li ser encamên pêşî ku têne belavkirin axivî û got ku hilbijêr dixwazin ew bibe şansolye.