Rûkiye Adiguzel - Abdurrahman Gok / MA / MEREŞ

Kayûm û leşkerên ku roja 15’ê reşemiyê/sibatê de dest danîn ser navenda alîkariyê ya Mala Gund a Hasankoca, 12 roj piştre tevahiya alîkariyan li kamyonan bar kirin û ji gund birin.  

Dilxwazên bi pêşengtiya HDP’ê kom bûn, piştî erdheja bi pileya 7.7 a Mereşê tavilê berê xwe dan Bazarcixê û heta 15’ê reşemiyê jî bênavber xebitîn. Dilxwaz, bi şev û roj xebitîn û hewl dan pêdiviyên gund û taxên tu kesî xwe negihandine pêşwazî bikin. Alîkariyên ji hêla odeyên pîşeyî, rêxistinên civaka sivîl ên ji gelek deverên Tirkiye û bakurê Kurdistanê, komeleyên gund, herêm û taxan û xelkê li Ewropayê ve dijî hatin şandin, bi saya dilxwazan li gund hatin komkirin û dihatin belavkirin. Lê Qeymeqamê Bazarcixê wê rojê leşkerên bi teçhîzat û kayûmê AFAD’ê girt cem xwe û hate gund. Piştre jî ji gund veqetiya û xebatên xwe bi rê û rêbazên cuda domand. 

KAYÛM 12 ROJ PIŞTRE ÇÛ

Dilxwazên ku ji 7’ê mehê heta 15’ê mehê zêdetirî 30 TIR’ên alîkariyê û bi dehan kamyonên alîkariyê li mexdûrên erdhejê belav kirîn, diyar kirin ku dê tayînkirina kayûmê qebûl nekin. Li ser vê yekê qeymeqamê navçeyê got; “Ez ê bi dehan dilxwazan bînim vê derê û alîkariyê bidim gel.” Piştre jî kayûm tayînê ser navenda alîkariyê kir. Lê kayûmê ku li navendê hat tayînkirin, di nava 12 rojan de alîkarî neda gundekî jî. Şêniyên gund gotin; “Tenê car bi car li wesayîtên taybet ên kesên nêzî xwe alav tije kirin û ji bilî vê tiştekî din nekirin.” Kayûm û kesên pê re duh (27’ê sibatê) tevahiya alîkariyan li kamyonan bar kirin û ji gund çûn. 

ALAV Û AMÛR BIRIN DEPOYA AFAD’Ê

Em îro di danê sibehê de çûn gund. Me dît ku ji bilî koneke li gund, tevahiya konan hatine rakirin û birine. Her wiha em hîn bûn ku kayûmê di heman demê de tevahiya betaniyeyan, soba, pateyên pitikan, mamayên zarokan, cil û berg û xurek li kamyonan bar kirine û birineembara AFAD’ê ya li navendê. 

XELKÊ HERÊMÊ: TALAN KIRIN

Welatiyên gund wiha bertek nîşanî vê yekê dan: “Her tiştek talan kirin. Li vê derê piştevaniyeke pir hêja hebû. Wan ciwanan kedeke mezin dan. Bi şev û roj ji bo me xebitîn. Pêdiviyên gel yekser bi cih anîn. Û ev yek jî li pêşberî kamerayan nekirin. Lê belê AFAD û qeymeqamê kayûm tayîn kir û dest danîn ser alîkariyan. Digotin ku dê ew bi xwe alîkariyan belav bikin. Lê di tevahiya 13 rojan de tenê wesayîtên taybet ên alîgirên xwe tije kirin û ji bilî vê yek alîkarî nedan cihekî. Her çend ku tevahiya alîkariyan bi xwe re biribin jî, em pê xweş in ku ji vir çûne.”