Diyarname

Hun Sen Serokwezîrê Kamboçyayê ye. Di sala 1952'yan de hatiye dinê. 71 salî ye. Nêzî 40 salan e serokwezîr e û niha kursiya xwe dide kurê xwe. Va ye çîroka wî...

JI GERÎLATÎ SEROKATIYA WELAT

Hun Sen karakterek cuda ye. Wekî dîktator tê bi nav kirin. Ew yek ji gerîlayên "Kmerên Sor" ên berê ye. Ew wekî gerîlayekî beşdarî "Kmerên Sor" (Rêxistina gerîlayan a ji bo Kamboçyayê şer kiriye, di navbera 1975-79'an de welat bi rê ve biriye) bûbû. Piştî belavbûna vê rêxistinê jî ew di nav siyasetê de maye. Di sala 1985'an de hatibû ser kar û ji wê demê ve ye Kamboçyayê bi rê ve dibe. Di salên 2007-08'an de bi îdîaya "i bo erdê wir bifroşe biyaniyan bi hezaran kesên li ser wî erdî ji cihê xwe qewirandine" hatiye sûcdar kirin.

Heta niha çawa dibe, bi çi awayî dibe jî Kamboçya bi rê ve biriye û hê jî li ser kar e. Û niha di vê dema ku hema hema 40 salên wî li desthilatdarî temam dibin, biryar daye ku kursiya xwe teslîmê kurê xwe bike. Wî eşkere kir ku ji niha û pêde kurê wî ku di heman demê de Serfermandarê Artêşê ye wê bikeve cihê wî.

JI 125 KURSIYAN 120 KURSIYÊN WÎ HENE

Yekşema borî li Kamboçyayê hilbijartin hebû û kurê wî Hun Manet wekî mebûs hat hilbijartin. Li Parlemenê 125 kursî hene, ji van 120 kursî partiya wî, Partiya Gel a Kamboçyayê girtine.

Hun Sen got kurê wî Hun Met wekî serokwezîr dê bikeve cihê wî. Sen got ku wî ev fikra xwe ji bo Kral Norodom Sihamoni vegotiye û wî jî bi erênî pêşwazî kiriye.

HUN MANET LI DYA Û ÎNGILISTANÊ XWENDIBÛ

Kurê Hun Sen ê bi navê Hun Manet li DYA'yê Akademiya Şer a West Pointê xwendibû. Paşê li Zanîngeha Bristolê doktoraya xwe li ser aboriyê kiribû.

27 SAL  CEZA DAN SEROKÊ MUXALEFETÊ 

Dadgeha Bilind a Kamboçyayê di meha adarê de serokê partiya muxalefetê Partiya Rizgariya Neteweyî Kem Sokha bi îdîaya "îxaneta li welat" bi 27 salan cezayê hepsê ceza kiribû.