Amed
Şaxa ÎHD'ya Amedê bi çalakiyeke 20'emîn salvegera xwe p^rioz kir. Serokê ÎHD'a Amedê Erbay; 'Hê karê me pir e.'

Şeva pîrozbahiya komeleyê li Qata Terasê ya Şaredariya Bajarê Mezin a Amedê pêk hat.
Şaredarê Bajarê Mezin ê Amedê Osman Baydemîr, Serokê DTP'a Amedê Nejdet Atalay, Şaredarê Kayapinarê Zulkuf Karatekîn, Şaredarê Yenîşehîrê Firat Anli, Serokê Şaxa ÎHD'ê ya Amedê Muharrem Erbey, Serokê Baroya Amedê M. Sezgîn Tanrikulu, Serokê Giştî yê Kurdî-Derê Mazhar Aktaş, Nûnerê Herêmê yê ÎHD'ê Mîhdî Perînçek, rêveberên Odeya Bijîşkan a Amedê, Berdevkê Demê yê Platforma Demokrasiyê ya Amedê Alî Oncu, Endamê Komîsyona Rêveberiyên Herêmî ya DTP'ê Alîcan Onlu, endamên Meclisa Şaredariyê, Serokê Giştî yê ÎHD'ê Husnu Ondul, Cîgirê Serokê Koma DTP'ê Sellahatîn Demîrtaş, Cîgira Serokê Giştî ya ÎHD'ê Reyhan Yalçindag û gelek parazvanên mafên mirovan beşdarî pîrozbahiyê bûn.

Serokê Şaxa ÎHD'ê ya Amedê Muharrem Erbey der barê avakirina komeleyê û armancên wê de axivî û got: "ÎHD ji sala 1988'an û vir ve her tim mafên mirovan parast. ÎHD digel pêkûtiyê, OHAL'ê, dadgehan, girtinan, xebatên xwe didomîne. Ev 20 sal in binpêkirinên mafên mirovan tespît dike."

Erbey, da zanîn ku di encama xebatên ji aliyê ÎHD'ê ve hatine meşandin de, gelek mirovan binpêkirin, pêkutî û tundiyên ku lê rast hatine, bi raya giştî re parve kirine û wiha dom kir: "Gelek mirovan jiyana xwe ji dest da. Gelek endamên me birîndar bûn, zirar dîtin. Li endamên me bi dehan doz hatin vekirin."

Muharrem Erbey li ser salên dawî jî wisa got: "Di serî de li herêma me, bi giştî li Tirkiyeyê pîvanên mafên mirovan bi awayekî pir cidî têne binpêkirin. Binpêkirinên mafên mirovan ku di nav 4 mehên dawî de derketine holê, ji yên ku di navbera salên 2002, 2003 û 2004'an de derketine holê zêdetir in. Karê me hemûyan, pir e."

Serokê Giştî yê ÎHD'ê Ondul jî li ser mîsyona komeleyê û asta ku hatiye rawestiya û banga "ji bo ku pêşî li binpêkirinan bê girtin, hêza xwe bikin yek" kir.

Komeleya Mafên Mirovan (ÎHD) di sala 1986'an de hatibû avakirin. Piştî avakirina komeleyê Amed jî di nav de sal bi sal li gelek bajaran şaxên wê hatibûn vekirin. Şaxa ÎHD'ya Amedê di sala 1988'an de hate avakirin.