Diyarname
Weşanxaneya Nûbiharê pirtûkeke din a helbestvan M. Zahîr Kayan weşand. Pirtûka bi navê “Hinekirî mane guliyên şevê” bi tehma gatayan hatiye belavkirin.
Heta niha pênc pirtûkên helbestan ên Kayan derketine; didu jê ji Nûbiharê derketibûn, “Hîç (Sî-Saya)” (2022) û “Asoya Peyvên Sermest” (2022). Niha yeka din li wan zêde bû. “Hinekirî mane guliyên şevê” ji 696 helbestan pêk tê ku Kayan peyva “Gata” ji bo şiîra xwe bi nav kiriye, ji ber ku di Îrana qedîm lawijên herî kevnar, şiîra herî dêrîn, qewl û gotinên gatayan in. Wî peyva gatayê ji bo dax û baxê dilê xwe kiriye rê û helbestên xwe bi ser rêz kirine.. Belkî wî bi gotina gatayê, rola şiîra kurdî derxistiye asteke pir muema û di vê dîwanê de daye dû vê muemayê…
Her sê pirtûkên Kayan ên ji Nûbiharê derketine ji hêla naverok û teşeya şiîrê ve dişibin hev; lê ciyawaziya ya dawî ev e ku bal û pala xwe dide hin taybetmendî û nuansên ristên nezm û lîrîzma kilaman û şiîra kurdî ya ku ji rehên antîk ên Îranî û Rojhilatî sûd wergirtiye. Di vê pirtûkê de, estetîka lawij û kilama kurdî bingeha şiîra wî ava kiriye. Ew vê carê ketiye pey şopa vegotineke antîk û qedîm.
- Hinekirî mane guliyên şevê / M. Zahir Kayan / Weşanên Nûbihar / Helbest / 216 rûpel