Diyarname
Gundê Textê Mircan yê navçeya Pulura Dêrsimê ku sala 1994’an ji ber sedemên ewlehiyê hatibû valakirin, piştî 32 salan bû mêvanê kevneşopiyeke ku ber bi jibîrkirinê ve diçû. Gundiyên ku piştî salan vegeriyan gundê xwe û jiyaneke nû ava kirin, bi wesîleya dawetekê hatin ba hev û şahiyeke mezin li dar xistin.

Zindîbûna kevneşopiyê
Dawet bi niyaz û gulbengan (Emrê Haq Dekerna), bi cilên herêmî yên bûk û zavatiyê dest pê kir ku bi awayekî kevneşopî merasîmek pêk anîn. Bûk li ser hespê, bi dengê def û zirneyê birin mala zavê. Vê merasîma kevneşopî,  ji hêla zavê û hevalên wî yê ji ser banê xanî ve bi avêtina sêvan berdewam kir, bi stranan kirmanckî (zazakî) û govendên gelêrî ên bi coş xemilandin. Gundî û mêvanan piştî gelek salan kêfxweşiya xwe ji zindîkirina vê kevneşopiyê anîn ziman.

Li axa xwe veger û çandê xwedî derketin
Mazûbanekî ku beşdarî dawetê bû, girîngiya parastina kevneşopiyê destnîşan kir û got: “Em naxwazin kevneşopiyên me winda bibin. Ez gelek kêfxweş im ku ev hîn têne parastin. Ciwanên nû dê van bibînin, bipirsin û ji bo lêxwedîderketin deriyek ji wan re vedibe.”
Dayika Firaz Yalvaç ya Ocaxa Derwêş Cemal jî wiha got: “Em ji bo van ciwanên ku bi dab û dêrît û bi zimanê Dêrsimê ku ji hev hez kirin li vir kom bûne. Ji bo vê axa pîroz, ji kerema xwe bi zimanê Xizir biaxivin, zarokên xwe fêr bikin, dawet û îbadetên cemê bi vî zimanî û çanda xwe bikin.”
Apê zavê Îmam Yalvaç jî diyar kir ku di sala 1994’an de piştî valakirina gund, ev yekem car e daweteke bi kevneşop li gundê wan tê kirin û wiha berdewam kir: “Em vegeriyan ser mal û milkên xwe. Ji bo domandina vê rêyê û jibîrnekirina kevneşopiyên xwe, me ev dawet li dar xist.”
Zava Ugurcan Yalvaç ku jiyana xwe bi Berfin Ozden re kir yek, wiha got: “Em bi kevneşopiyên xwe vegeriyan gundên xwe da ku kevneşopiyên me neyê jibîrkirin.”

Bûn sembola vegera li eslên xwe
Ev daweta taybet nîşan da ku gundek piştî koçberiya bi darê zorê li eslên xwe vegeriya ye, bi biryardarî çanda xwe diparêze û zindî dihêle. Gundê Textê Mircan, bi vê kevneşopiya xwe ji nû ve çanda gund zindî kir, hem li paşeroja xwe xwedî derket hem jî bi hêvî li pêşerojê dinihêre.