___Cemil Oguz___
Fûara Pirtûkan a Amedê ji aliyê TUYAP'ê ve tê organîzekirin. Îsal hin weşanxaneyên kurdan beşdar nabin. Weşanxane ji buhabûnê bi gazin in. Va ne agahî:
10'emîn Fûara Pirtûkan a Amedê îro dest pê kir û heta 4'ê meha pêşiya me dê bidome. Fûar her roj saet di navbera 10.00 - 19.00'an de vekiriye. Li dor 150 weşanxane, saziyên sivîl beşdar dibin. Lê hin weşanxaneyên kurdan nîn in.
WEŞANXANEYÊN KURDAN ÊN BEŞDAR
Li Amedê heta niha hema hema hemû weşanxaneyên kurdan beşdarî fûarê dibûn lê îsal hin weşanxane beşdar nabin.
Li gor lîsteya TUYAP'ê weşanxaneyên kurdan, weşanên Aram, Aryen, Belkî, Bêjing (wekî Tamara beşdar dibin) Dara, Deng, Doz, Jînda, Lûvî, Morî, Na, Nûbihar, Pall, Sîdar, Sîtav, Vate, Wardoz, Zarg, Zîlan Akademî beşdar dibin.
Ji bilî van hin sazî, komele û weqfên kurdan jî standê vedikin. Ji wan Weqfa Mezopotamyayê, Weqfa îsmaîl Beşîkçî, dîsa Dersim Yazarlar Dernegi, Diyarbakir Yazarlar Birligi, Şaredariya Bajarê Mezin a Amedê hin saziyên ku dê li fûarê bin.
WEŞANXANEYÊN BEŞDAR NABIN
Ji weşanxaneyên kurdan Weşanên Avesta bi ser hesabê xwe re ragihand ku ew beşdar nabin. Avestayê got, "Çend salên dawî maliyet pir zêde bûn. Me nexwest bêyî standeke baş û cihekî fireh beşdar bibin. Bi ser de jî di wextekî ne baş de çêkirin. Ji serî de tu giringî bi îqaz û gotinên me nedan. Tu caran bo aktivîteyên me tiştek nekirin, cihê xirab dan me. Yarmetî û hêsankariya dikirin, bo me nekirin. Zirara me hatibû radeyekê ku nedihat qebûlkirin. Di nav van şertan de me qerar da ku beşdar nebin. Em xemgîn in. Qerareke pir zehmet bû bo me lê em mecbûr man."
Ji weşanxaneyên kurdan weşanên J&J beşdar nabe. Li gor agahiya xwediyê weşanxaneyê Azad Zal da me, beşdariya fûarê gelek buha bûye, ji quwetê der e û vê yekê kiriye ku ew nikaribin beşdar bibin. Li aliyê din Zal rexne li amadekaran jî dike ku heta van rojên dawî jî ji bo fûarê reklameke baş nekirine.
GERÎNDEYÊ NÛBIHARÊ ÇEVÎK: NEBÛNA HIN WEŞANXANEYAN KÊMASÎ YE
Li ser fûarê me serî li dîtinên Gerînendeyê Weşanê yê Nûbiharê Suleyman Çevîk jî da. Çevîk li ser weşanxaneyên beşdar nebûne dibêje, "Xwezî ew jî li vir bana. Çiqas weşanxane zêde bin, însan zêde bin, fikrên cuda zêde bin hereket tê fuarê. Însanên ji wan hez dikin hene, hinek însan bo weşanxaneyan bi xwe tên, nebûna wan kêmasî ye, xwezî hebana. Biyara wan şaş e."
Çevîk balê dikişîne ser girîngiya Fûara Pirtûkan a Amedê û dibêje, "Cihek wekî Diyarbekir de tune be mirov wê li ku hebe? Hebûna wan bo me jî baş dibû. Dema însan diçin serdana standên wan tên ê me jî. Wekî par divê hemû hebana. Ez xemgîn bûm."
15-20 PIRTÛKÊN NÛ
Gerînendeyê Weşanê yû Nûbiharê Çevîk li ser beşdariya Nûbiharê di fûarê de jî van agahiyan dide me; "Me amadehiyeke taybet çêkir bo vê fûarê. Cihek ji par mezintir girt. Di van 3-4 mehên dawî de me hinek pirtûk nû çap kirin; dor 15-20 pirtûkên me yên nû hene, me anîne fûarê. Yên berê çapên wan ên dubare jî me çêkirin. Dor 30-40 nivîskarên me jî wê pirtûkên xwe îmze bikin. 4-5 bernameyên me hene. Dîsa me kampanyaya 'Pirtûkên di sepetê de' da dest pê kirin. Hinên pirtûkan bigirin bixin wir, dê hinek din ji xwe re bibin."
Li aliyê din Suleyman Çevîk dibêje ku Tuyap li wan geriya ye, gotiye ji ber ev 10 sal in her beşdar bûne îro dê plaketek pîrozbahiyê bidin wan.
Hin ji weşanxaneyên xwedî dîrok û xwedî gelek pirtûkan wekî Weşanên Lîs, Weşanên Peywend jî ne li fûarê ne.
Di fûarê de bi ser 70'yî re çalakiyên çandî hene wekî panel, gotûbêj, muzîk, atolye hene ku hin ji wan bi kurdî ne. Li aliyê din bi dehan nivîskarên kurd dê pirtûkên xwe îmze bikin.
TUYAP'ê plaket da hinan; li ser navê Nûbiharê, Suleyman Çevîk plaket girt.
ROJHILAT: BILA WEŞANGERÊN TIRK Jî PIŞTGIRIYÊ BIDIN
Di merasima vekirina fûarê de Berpirsê TUYAP'ê Îlhan Ersoz, Sekretera Gşitî ya TYB'ê (Yekîtiya Weşangerên Tirkiyeyê) Nazli Berivan Ak, Serokê DTSO'yê Mehmet Kaya, Hevşaredara Bajarê Mezin a Amedê Serra Bucak, Berdevka Meclisa Jinan a DEM Partî Halide Turkoglu axivîn.
Li ser navê YEW-KURD'ê (Yekîtiya Weşangerên Kurd) jî Jêhat Rojhilat axivî. Rojhilat got ku li Tirkiyeyê şertên weşangerên tirk û kurd ne yek e û wiha dom kir, "Em qursan didin bi van zimanê xwe hîn dibin. Li Tirkiyeyê ger 30-40 milyon kurd hebin, hê kurdî nebûbûbe zimanê perwerdehiyê, hê em bi qursan hînê kurdî bibin; bi vê yekê dikare rewşa weşangeriya kurdî ya li hemberî tirkî bê fêmkirin. Loma em dixwazin xwedî li ziman bê derketin, em qala wijdanê dikin. Gelek bi 30-40 milyon heye divê bi qursan zimanê xwe hîn nebe. Weşangerên tirk jî divê vî warî de piştgiriyê bidin." (Ev paragraf paşê li nûçeyê hatiye zêdekirin)
**
Nûçeya Eleqedar:
- Rojên li darketina Fûara Pirtûkan a Amedê diyar bû
******************************