Diyarname
Kovareke nû ya bi kurdî bi navê Dîwar derdikeve. Li gor amadekarên kovarê dê kovar çandî, wêjeyî ya mehane be û kovar dê aktuel be.

Niha ji bilî başûrê Kurdistanê li parçeyên din kovarên du mehane, sê mehane hene lê yên mehane hema bibêje di asta nînbûnê de ne. Jixwe kovarên mehane çandî û aktuel nîn in. Niha kovareke bi navê DÎWAR wekî mehane dertê ku dixwaze vê valahiyê dagire. Kovar dê hejmara wê ya yekemîn serê salê derê.

Di nav koma ku kovarê derdixe de navê sê kesan hatiye diyarkirin; Berpirsiyarê Giştî Agirî Soran,  Gerînendeyê Giştî yê Weşanê Helîm Yûsiv û Kordînatorê Weşanê Cemil Oguz. Li gor gotina Helîm Yûsiv, ev her sê kes wekî sereke di kovarê de cih digirin lê ji her derê ku kurd lê dijîn kes hene ku bi wan re ketine nav têkiliyê û dê di warê têkilî û nivîsande alîkariya wan bikin.

Kovarê bi navê "Kovaradiwar.com" malpera xwe jî vekiriye û ji ser wir re dixwazin xwe bigihînin hezkiriyên kurdî.
Berpirsên kovarê li ser çima kovareke wisa û rêgezên wan ev tişt weşandine:
 
Çima Kovara “Dîwar”?
 Her weşaneke, berî dest bi weşanê bike, pirsa “Çima em dertên?” divê ji xwe bike. Yê me jî bersiva “Çima Kovara Dîwar?” wisa ye:
Li seranserê cîhanê, kovarên bi kurdî yên çandî û wêjeyî, kovarên ku bi mijarên çandî yên aktuel mijûlin, pêre jî nimûneyên baş ên ji çîrok û helbestên kurdî biweşînin, hene yan nîn in, yan jî gelek hindik in. Li ser vê em ketin rê û “Dîwar” wekî pêdiviyekê hate holê.

Kovar wê li ku amade bibe û li ku belav bibe?
Navenda kovarê li Almanyayê ye. Edîtorî jî. Lê di serî de ji Stenbolê, ji bakur û rojavayê Kurdistanê, her wiha ji Ewropayê hevalên ku ji niha de em bi wan re ketine nava tevgerê, ew dê hem ji me re nivîsan amade bikin û bişînin, hem jî dê bi der û dora xwe bidin nivîsandin û şandin. Bi vî awayî emê bikin ku kovar hem neteweyî û hem jî navneteweyî be. Lê emê bikin ku hem bi awayekî çapkirî, hem jî bi ser internetê re (wekî PDF) ragihînin her kesî.
 Di warê xwegihandina kovarê de, hem bi rêya e-mailê û hem jî bi rêya telefonê her kes dê bikaribe xwe bigihîne kovarê. Emê bikin ku li her welatê dinyayê aboneyan çêbikin û kovarê bigihînin wan. Ji bilî vê, li hin bajaran (wekî Stenbol, Amed û hwd.) dê li hin cihan kovar bê peydakirin
 
Çima mehane?
 Em başûrê Kurdistanê deynin aliyekî, li perçeyên din ên Kurdistanê, li Ewrupayê û welatê din ku gelek kurd lê dijîn, hejmara kovarên bi kurdî gelek kêm in. Yên hene jî, hin jê sê mehane ne, hin du mehane, hin nikarin di dema ku diyar kirine de bi rêk û pêk bên derketin jî. Bi gotineke din, bi kurmancî, hin kovarên sê mehane û du mehane yên kurdan hene, lê mehane nîn in. Me xwest bi awayeke mehane em kovarê ragihînin xwendevanên kurdî û hindik be jî vê valahiyê dagirin.
 
Çima Aktuel
 Kovarên me yên kurdan piranî “çandî, hunerî û wêjeyî” ne. Lê piranî jî sar in, ji aktuelbûnê dûr in. Me xwest bi “Dîwar” hem aliyê çandî yê aktuel pêş ve bibin, hem jî nimûneyên girîng ên ji wêjeya kurdî pêşkêşî we bikin. Di kovarê de hûnê her meh bikaribin bi rehetî agahiyên çandî yên aktuel, mijarên girîng, balkêş û aktuel bixwînin. Di heman demê de mînakên baş ên ji çîrok û helbesta kurdî, hûnê di kovarê de bibînin. Perçeyeke girîng emê ji bo danasîn, rexnekirin û nirxandina pirtûk û bûyerên wêjeya kurdî veqetînin. Bi awayekî ku reng û dîmenê wêjeya kurdî ya nûjen, meh bi meh, bê bigewdekirin. Pêşniyara me ev e: Hema Dîwar bişopînin hûnê bibînin ka em qala çi dikin…
 
Kovara ku telîfê dide
 Di serî de me got tenê derxistina kovarê, ji bo vê ji nivîskaran nivîs xwestin têrê nake. Me got li dinyayê tiştê heye ku em kurd nakin çi ye û em li ser wê fikirîn... Di dawiyê de me got her kes peyvek be jî, binîvisîne, ew peyv bi qîmet e û nivîsa ku ji van peyvên bi qîmet dertê biqîmetir e, loma jî telîfê heq dike. Loma em dê ji bo her nivîs, çîrok û her helbestê telîfê bidin.
 
Rêbazên me ji bo weşandina nivîs û nûçeyan
 - Edîtoriya kovarê azad e, her nivîsa ku bê biryara weşandin an neweşandinê bide. Di vî warî de azadiya xwe her diparêze. Ger biweşîne jî neweşîne jî hayê nivîskar pê dixe.
 - Edîtoriya kovarê her nivîsa ku ji wan re bê şandin ger biecibîne diweşîne û pêre jî telîfa nivîsê çiqasî bike dişîne ser hesabê bankeyê yê xwediyê/a nivîsê.
 - Bîrdozî û baweriya kesan çi dibe bila bibe, her kes dikare ji Dîwar re nivîsan bişîne.
 - Di çîrok û helbestan de nivîskar azad in ji xwe re mijarê hilbijêrin. Lê wekî din nivîs/nûçeyên balkêş û girîng ên li ser çandê hebin û nivîskar/rojnameger bixwazin ji me re bişînin rûpelên kovarê ji bo wan jî vekirî ne. Her wiha di rewşeke wisa de berê de dikarin me agahdar bikin ku dê li ser mijareke wisa nivîsekê binivîsin û bişînin.
- Her nivîsa ku ji Dîwar re hatibe şandin divê li ciheke din nehatibe weşandin.
 - Her nivîsa ku ji Dîwar re bê şandin û bê weşandin, êdî ew nivîsa “Dîwar”e û bêyî destûra fermî ya edîtoriya Dîwar li tu kovar, rojname, malperan nayê weşandin, çavkanî bê nîşandayîn jî weşandina wê qedexe ye.
- Ger ew nivîs çîrok an helbest be, xwediyê nivîsê rojekê pirtûkekê derxe dikare wê helbesta xwe an çîroka xwe têde biweşine, lê wekî din nikare li ciheke din biweşîne. Ger Dîwar bi xwe ji çîrok û helbestên jêre hatine şandin weku pirtûk berhev bike û biweşîne, wê çaxê li gor derfetên xwe careke din telîfê dide xwediyê nivîsê.
 - Edîtoriya kovarê, di nivîsan de, li asta wêjeyî, li girîngî û balkêşî, li zimanekî şayik û kurdiyeke pak digere.
 
Em kî ne?
 Em çend kesên serbixwe ne ku di bin banê “Hêvî Gruop”ê de hatine ba hev û derdê me ew e, ku bi vê kovarê em beşdarî avakirina dîwarekî ji dîwarên avahiya wêje û çanda kurdî ya hemdem bibin.

Ji bo têkiliyê:
www.kovaradiwar.com
peywendi@kovaradiwar.com
Dîwar
Friedhofstr. 19
64401 Gross-Bieberau
Germany