SERÊKANIYÊ 

Firneya Serêkaniyê ku ji berî 10 mehan ve ji ber şer û pevçûnan rawestiya bû dest bi kar kir.

Firneya Serêkaniyê ya sereke piştî êrîşên komên çekdar ên Cebhet El-Nusra û Artêşa Azad ku di 8’ê sermaweza  2012’yan destpê kiribû hate rawesatandin. Êrîşkaran  gelek amûrên sazî û dezgehên xizmetan ên bajêr dizîn û talan kirin. Firneya Bajêr jî yek ji dezgehên ku rastî talana çeteyan hatibû û piraniya alavên wê hatibûn dizîn. Ji ber amûrên firneya gel a bajêr hatibûn dizîn ev 10 meh bû nedixebitî.

Bi alîkariya Meclisa Gel firin hate tamîr kirin

Meclisa Gel a Serêkaniyê ji pêdeviya nan li bajar ev demeke hewl dida ku firina gel tamîr bike û li şûna alavên hatine dizîn parçeyan peyde bike. Piştî rizgarkirina Serêkaniyê ji komên çeteyan, derfet çêbûn Meclisa Gel firina bajar tamîr bike. Piştî tamîrkirinê firne roja 21'ê mehê bi awayekî asayî dest bi xebatê xwe kir. Bi munasebeta vekirina firneyê ji bo rojekê nan bê pere li gel hate belavkirin.

Ambargo bandoreke neyînî dike

Ji ber ambargoya li ser rojavaya Kurdistan peyde kirina alavên nan peyde kirin gelek zahmet bûye. Komîteya Xizmetan a Meclisa Gel ji ber qutbûna ceyranê jî cenetor û sotemenî peyda kirin. Komîteyê pêdiviyên nan ji ard, şîr û hevîrtirş jî peyda kir. Ji ber ku gelek xebatkarên firneyê nehatin ser karê xwe komîteyê karkerên din peydar kirin.

Rojê 4 ton ard dikin nan

Têkildarî xebatên firneya Serêkaniyê Endamê Rêveberê Firneya Serêkaniyê Mihemed Ehmed da zanîn ku di rojên destpêkê de 4 ton ard çêdikin û di nava çend rojan de dê karê xwe zêde bikin da ku têra hemû şêniyên bajêr bike. Ehmed,  destnîşan kir ku roja yekê ji ber kêmbûna xebatkaran bi danekî dest pê kir û piştî ku Meclisa Gel xebatkar peyda kirin dê sibê bi 2 danan firne bixebite û armanca wan ku rojê 10 ton ard bê çêkirin.

Ehmed, diyar kir ku heta niha gelek karkerên firneyê yên berê nehatine karê xwe û got ku heger neyên dê ji kar bêne derxistin.

Wê li taxan navendên nanfirotinê bên vekirin

Bi dehan şêniyên bajêr li ber firneyê kom bûne û hêzên Asayîşê ji hindir û derve jî ji bo rêxistinê di nava tevgerê de ne. Endamê Meclisa Gel a Serêkaniyê Îdrîs Etiya da zanîn ku ji sibê ve dê navendên belavkirina nan li hemû taxan bê vekirin û dê gel bi hesanî nanê xwe bikire. Etiya da zanîn ku dê endamên Meclisên taxan dê rêveberiya belavkirina nan bikin.

Ji ANHA'yê hatiye girtin