STENBOL

BDP'ya Stenbolê, 30 hezar daxwaznameyên bi armanca "perwerdeya bi zimanê zikmakî" kom kiribû, pêşkêşî Midûriyeta Perwerdeya Neteweyî ya Stenbolê kir.

Hevserokê Rêxistina BDP'ê ya Stenbolê Emrullah Bîngul, li ber Midûriyeta Perwerdeya Neteweyî daxuyanî da çapemeniyê û got, "Zimanê zikmakî mafekî bingehîn e. Bi tu awayî li ser muzakere û nîqaş nayê kirin."

Bîngul diyar kir ku wan 30 hezar daxwazname ji deverên cuda yên Stenbolê di nava rojekê de kom kirine û xwest, hemû astengiyên li pêşiya zimanê dayikê bên rakirin.

Bîngul da xuyakirin ku eger di pêvajoya çareseriya demokratîk de ev daxwazên kurdan bi cih neyên dê di nava kurdan de fikar û gumaneke mezin derkeve holê û destnîşan kir ku ew hêvîdar in daxwaznameyên pêşkêşî Midûriyeta Perwerdeya Neteweyî kirine, bêne qebûlkirin. Bîngul got ku eger neyê qebûlkirin divê sedema vê ji xwediyên daxwaznameyan re bêne ragihandin.

Wekî notek: BDP'ê li gelek bajarên Tirkiyeyê û li hemû bajarên kurdan xebata berhevkirina daxwaznameyan dabû dest pê kirin. Heta niha bi sed hezaran daxwaznameyên ku hatine berhevkirin, dane Midûriyetên Perwerdehiya Neteweyî ya Tirkiyeyê û daxwaza  perwerdehiya bi zimanê zikmakî hatine kirin.