Diyarname

33’yemîn Festîvala Fîlman a Stenbolê bi awayekî serketî bi dawî bû. Îsal di du hefteyan de bi giştî 135 hezar kes çûn li fîlman temaşe kirin.

Di du hefteyên festîvalê de li 8 salonan 593 seans li dar ketin. Di van seansan de fîlm di bin navê 20 beşan de hatin nîşandayîn. Bi giştî 357 fîlmên metrajdirêj, kurtefîlm û belgefîlmên 245 derhênerî ku ev ji 50 welatên dinyayê bûn di festîvalê de derketin pêşberî temaşevanan. Rêja tijebûna salonan bi sedî 84 hat diyarkirin û 135 hezar kesên bûn mêvanên festîvalê her yekî li hin beşan, hin fîlman temaşe kir, demek xweş derbas kir.

Ji bilî nîşandayîna fîlma 3 dersên sînemayê, 7 gotûbêj bi beşdariya derhêner, lîstikvan an sazkarên fîlman li dar ketin. Di çarçoveya “Koprude buluşmalar” (Hevdîtinên li ser pir) de 3 atolye, 5 dersên sînemayê û 3 gotûbêj hatin organîzekirin.

Ji dinyayê bi dehan derhêner bûn mêvanên festîvalê. Roja 17’ê mehê fîlmê Zeki Okten “Suru” (Kerî) ku Tuncel Kurtiz jî têde dilîst bi beşdariya jina Kurtiz Menend Kurtiz, lîstikvan Halit Ergenç û Kenan İmirzalioglu li dar ket û Kurtiz hat bibîranîn. Ahmet Uluçay bi nîşandayîna kurtefîlmên wî û belgefîlmê “Tepecik Hayal Okulu” (Derhêner Guliz Saglam) ku li ser jiyana wî ye ew hat bibîranîn.

Beşek mezin ji çapemeniya dinyayê jî eleqe nîşanî festîvalê da. Ji Almanyayê rojnameyên Frankfurter Allgemeine Zeitung, Die Tageszeitung, Suddeutsche Zeitung, ji Fransayê L’Humanité, ji Siwîsreyê NZZ, ji Lubnanê Daily Star, ji Bulgaristanê Dnevnik Daily, ji Meksîkayê Sol de Mexico, ji Misirê Al Ahram festîval şopandin. Her wiha Euronews, Associated Press, Monocle Radyo, BBC Radyo, Televîzyona RAI ya Îtallayê, ANT1 a Yewnana, Televîzyon û radyoya Dewletê ya Çînê, Televîzyona Misirê, ARD’ya Alman, radyoyên WDR, Deutschlandradio û Radyoya Belgradê festîal şapondin. Her wiha kovarên sektora fîlman jî festîval şopandin.

34’emîn Festîvala Fîlman a Stenbolê saleke din dîsa dê meha avrêlê de li dar bikeve.

 ***  

Nûçeyên li ser Festîvala Stenbolê ya Îsal:

- ‘Ben O Degilim’ bi ser ket, kurdî hate rojevê 

- Di festîvalê de du rojên dawîn 

- 'Hebû, tune bû' li wir çîrokek hebû 

- Di festîvalê de belgefîlmên li ser kurdan 

- 10 deqe paşê dê Parîs têk here! 

- Di vekirina Festîvala Fîlman de ji bo Yilmaz Guney silav şandin 

- Şahiya fîlman: Bernameya Festîvala Fîlman a Stenbolê eşkere bû 

- Serokê Juriya Laleya Zêrîn diyar bû 

- Festîvala Stenbolê li benda fîlman e