Diyarname

33’yemîn Festîvala Fîlman a Navneteweyî ya Stenbolê ku dê di navbera 5-20’ê avrêla 2014’an li dar bikeve, deriyê beşdariya fîlman vekir. Yên ku bixwazin fîlmên xwe ji bo festîvalê bişînin divê heta 31’ê rêbendana 2014’an berhemên xwe bigihînin ber destên amadekarên festîvalê.

Festîvala Fîlman a Navneteweyî ya Stenbolê li Tirkiyeyê yek ji festîvalên herî mezin e ku ji aliyê Weqfa Çand û Hunerê ya Stenbolê (ÎKSV) ve tê lidar xistin. Festîvala ku her sal bi eleqeyeke mezin re rû bi rû dimîne, ji bo sala pêşiya me dîroka li dar ketin û dîroka beşdariya fîlman diyar bû. Di festîvalê de fîlm di bin beşa “Laleya Zêrîn a Pêşbaziya Neteweyî” dikevin pêşbaziyê. Di vê çarçoveyê de xelata fîlm, derhêner,  muzîk, lîstikvan (jin û mêr), senaryo, derhênerê dîmenê, vesazkirin û muzîkê de xelat têne dayîn. Her wiha xelata taybet a juriyê jî.

Ji bilî fîlman di festîvalê de belgefîlm û anîmasyon jî têne nîşandayîn lê ev ne di pêşbaziyê de, tenê ji bo nîşandayînê digirin nav festîvalê. Kesên bixwazin dikarin ji ser film.iksv.org  re xwe bigihînin amadekarên festîvalê.

Navnîşana festîvalê jî bi vî rengî ye: İKSV Nejat Eczacıbaşi Binasi, Sadi Konuralp Caddesi No: 5 Şişhane / Beyoglu / Stenbol.