OKTAY CANDEMÎR

Pêşangeha ji wêne û nivîsên li ser erdeheja Gimgimê di Festîvala Girê Koxê de hatin lidarxistin.

Li Navçeya Gimgimê ya Mûşê di 19'ê gelawêja 1966'an da erdhejek çêbû û di encamê de bi hezaran kesî jiyana xwe ji dest da.
Rojnameger Hidir Alî Bîngol ku xizmên xwe di erdhejê de winda kir, wêneyên ku piştî erdhejê li herêmê kişandibûn, nûçeyên der barê bûyerê de û daxuyaniyên rêyedaran ên wê demê bi pêşengehekê, di 6'emîn Festîvala Girê Koxê de nîşan da. Di pêşengeha li Kolana Sofular hatiye vekirin de 150 tablo cih digirin.

Bingol, li ser pêşengehê got ku di erdhejê de xizmên xwe winda kiriye û wiha berdewam kir: "Bi vê pêşengê min xwest erdhejê û pirsgirêkên di vê hêlê de tên jiyîn ji nû ve bînim rojevê. Piştî erdhejê ez çûm Almanyayê. Min li wir dest bi rojnamegerî kir. Min ji pêşketinên têkildarî erdhejê û sozên ji aliyê dewletê hatibûn dayîn arşîvek çêkir."

Hidir Alî Bîngol, diyar kir ku piştî erdhejê dewletê soza alîkariyê dabû wan û wiha dom kir: "Dewletê sozên ku dan bi cih neanî. Ji ber birînên erdhejê nehatine derman kirin ez gelekî xemgîn im. Heta niha jî li hemberî erdhejê tu tedbîr nehatine girtin. Armanca min ew e ku birînên erdhejê yên nehatine dermankirin bînim rojevê."

Rojnameger Bîngol di dawiyê de wisa got: "Ji bo pirsgirêkên vî gelî bên dîtin, ez dê li hemû deveran vê pirsgirêkê binîm ziman. Sozên ku hatin dayîn nehatin girtin. Divê dewlet bi lez li hemberî erdhejê tedbîran bigire."

Ji DÎHA'yê hatiye girtin