M'ya pêşî ji "M"ya Muhittin Batmanli (Serokê Koma Diyalogê ya Dîcle-Firatê) tê.Ji ber ku Hevserokê HDP'ê Selahattin Demîrtaş banga xwedî lêderketina Sûrê kir û gel derket kuçeyan meşiyan, pêre jî hin birîndar çêbûn, Muhittin Batmanli der barê Demîrtaş de serî li Dozgeriya Komarê ya Amedê da (1) û xwest dozger der barê Demîrtaş de lêpirsînê bide dest pê kirin. Batmanli wisa dibêje: "Ji kî hatibe bila bê me gotibû emê dijî hemû tevgerên ku hizûr û aştiya gel xira dikin bin. Birêz Demîrtaş gel vexwendiye kuçeyan û bi vê bûye sedema şîdet û kaosê, bûye sebeb ku aştiya civakî xira bibe, ewlehiya can û malê gel xira bibe. Di dema ku gelê me herî zêde pêdivî bi aştiyê heye de can û malê gel zirar dîtiye, bûne sedem ku mafê wan ên bingehîn ê ji zagona bingehîn tê bê binpêkirin. Ez bang li saziyên sivîl dikim ku hemû saziyên sivîl li dijî vê bikevin nav tevgerê."
Pêşî, tiştek gelek pîroz e mirov aştiya civakî bixwaze, xwedî li mal û canê mirovan derkeve. Dema mirov wisa li meseleyê binêre, mirov dikare bi rehetî bibêje Muhittin Batmanli sedî sed mafdar e û mafê xwe bikar aniye serî li dozger daye.
Dayika Taybet Înan
Lê em pirsên wisa bikin: Ev Muhittin Batmanliyê ew qas mirovparêz e, dema li taxa Nûr a Silopiyê diya 7 zarokan Taybet Înan li kuçeyê bi guleyan hat kuştin û hefteyek cenazeyê wê li kuçeyê ma çi kir? Çû der barê kesên wisa kiriye de serî li dozgerî da?
Mebûsê CHP'ê Sezgin Tanrikulu nameya kurê Taybet Înan Mehmet Înan li meclisê xwend (2). Vaye ji wê tenê du sê rêz, "Dema li diya min dan me baz da. Berî me Apê min xwestiye here lê li wî jî dan. Dema ez çûm cîranan apê min dibirin. Min got "Diya min?", gotin "Li Kuçeyê ma."
"Diya min tam bi temamî heft rojan li kuçeyê ma. Em yek jî ranezan, me got belkî kûçik bên, yan çûk bên wê bixwin. Li wir raza, em 150 metre dûrê wê mirin."
Pitik Mîray
Pitika 3 mehî Mîray ku li Taxa Sûr a Cizîrê hat kuştin. Apê wê Abdurrahman Înce wisa dibêje (3): "Mîray di hembêza meta xwe de û dema li ser derenceyê bû gule lê dikeve. Dibêjin qey miriye lê xwîn nîn e. Pênc deqe paşê digirî. Birê min Abdulkerîm gazî ambûlansê dike û alîkarî dixwaze. Yên li ser xeta telefonê dibêjin bila jin û mêrek ala spî hildin û pitikê ehta cihek bînin. Li ser vê bavê min Ramazan, diya min Rûkiye û birê min Abdulkerîm pitikê digirin û derdikevin derve. Bavê pitikê Burhan û diya wê Soulîn li mal dimînin. Bêyî zêde dem derba bibe dengê çekan tê. Berî ambûlans bê gule ber didin. Mîray bi guleya duyem ku lê dikeve li wir dimire, Ramazan (têbinî: Ramazan înce yê 80 salî paşê dimire) û Rûkiye bi giranî birîndar dibin. Saetek li wir li kuçeyên d imînin. Birê min li mebûsê HDP'ê Faysal Sariyildiz digere, li ser vê ambûlans tê."
Ka te got çi birêz Batmanli?
Li Tirkiyeyê li gor Zagona Bingehîn encax Koma Wezîran dikare li hev bicive, li gor rewşê dikare biryara qedexeya derketina kuçeyan bide, lê li bajarên kurdan qeymeqam bê hiqûqî vê yekê dikin. Rojek me nedît ev Muhittin Batmanliyê mafparêz serî li dozgeriyek dabe û xwestibe ev qedexe rabin; ku ev qedexe dibin sedem ku jinên bi heml nikaribin zarokan bînin, extiyarên nexweş herin nexweşxaneyan, zarok herin dibistanê...
Li Sûrê wisa nivîsandin "Ger tu tirk bî serbilind be, tirk nebî îtaetê bike", wisa nivîsandin "Tuyê hêza tirkan bibînî"... Ka ev Batmanliyê me çi kir?
Em dikarin qala gelek mînakên din jî bikin lê bes in. Em pirsek ji endamên din ên Diyaloga Dîcle-Firatê bikin û derbasî M'yek din bibin: "Hûn çi difikirin? Bi ya we jî Batmanli tiştek rast kiriye? Ger kiribe ji bo van mînakan gotina we çi ye, ger rast nekiribe çima serokê koma we ye û hûn jî li dû diçin?"
Em bên ser sernavê: Ji "M"yan yek Muhittin e, yê din Mîroglu ye. Mîrogluyê em dizanin dijî peyva "Ne mutlu Turkum diyene" (Çi serbilidiye mirov tirk be) derketiye û niha jî mebûsê AKP'ê ye; Lê em nabînin ku li ser "Ger tu tirk bî serbilind be, tirk nebî îtaetê bike" tiştek gotibe.
M'yê sêyemîn jî Muhsîn e, Muhsin Kizilkaya. Ew Kizilkayayê ku em dizanin ew jî ji Newrozê hez dike û ew jî qebûl dike ku Newroz cejna kurdan e. Îro, dema ku ev nivîs hat nivîsandin li bajarê wî, li Culemêrgê walîtî li navendê û li hemû navçeyan (4) pîrozbahiyên Newrozê qedexe kir, her wiha walîtiya Mêrdînê û Rihayê jî... Û Kizilkayayê me Şêwirmendê Serokwezîrê Tirkiyeyê ye. Nizanim tiliya wî jî di qedexeyê de heye yan na.
Nizanim hewce dike em mînakan zêde bikin yan na?
Mesela li Cizîrê di jêrzemînan de birîndar hatin kuştin ligel ku derfet hebû ew bi saxî ji wir bêne derxistin...
Mesela partiya van her du M'yan dibêje "Di dema me de kuştinên kiryar nediyar nîn in." Lê belavkarê rojnameya Azadiya Welat Kadri Bagdu (5) li Edeneyê hat kuştin û sal û nîv derbas bû hê jî bersûc nehatine dîtin. Ka ev her du M çi dibêjin?
**
Têbiniya min: Min ev nivîs nivîsî û ez poşman bûm, ku baweriya min ew e bi kêrî tiştek nayê; Ji ber ku ji van M'yan yek jî guh nadê. Bi baweriya min ew her sê M jî bi qasî min bi van tiştan dizanin... Loma min jê bir. Lê bi baweriya "Notdanîna ji bo dîrokê" min careke din nivîsî. De a bixêr, belkî ji van her sê M'yan yek rabe bersiva me bide? Belkî yek ji wan rabe bibêje te tiştên şaş nivîsîne? Çi zanim... Ka dîrok wê çi nîşanî me bide...
**
Ji bo çavkanî sernavan bitikînin
3- Nûçeyek ji BBC (em heqê wan nexwin, DÎHA, Evrensel, gelek weşanên din jî nûçeyek wisa saz kirin)
.jpg)
.jpg)
