.jpg)
Li Kurdistanê neteweya kurd û hemû pêkhateyên Kurdistanê ji dîrokê ta niha ji bûyer, babolet, tragedya, êş û eleman meriv dikare bêje mêrgeke mijarên hunerê ye, bi taybetî bo wêjeyê mijargeh e; çi dixwazî, te çi divê bo helbestê, çîrokê, romanê, fîlm, keval, muzîk û hwd. heye.
Ji serdema nû vir ve, ji salên nodî heta niha devê kîjan pirtûka kurdî vekî îlam ji wan mijaran li yekê diqelibî; li derdora pirsa navendî çîrok û helbesta mêrxasan, jinxasan, berxwedêran; bi hişmendiya neteweyeke serbilind hemû têra xwe hatine vegotin. Ez ne bawerim ku bûyer û lehengekî/ê serê neteweyê bilind kiriye nehatibe vegotin, bi wêjeyê (ast û huner li alîkî) nehatibe honandin.
Helbet li derdora hişmendiya neteweyeke îdîalîzekirî ya ku têkoşêr, berxwedêr, serhildêran dabe pêşiyê, berdêlên giran hatibin dayîn şik nîn e ku wêje jî wê xwe bide bin wî barî, bûyer û lehengên serê neteweyê bilind dikin-kirine bi hêz û qeweta wêjekar bibin mijarên wêjeyê.
Û dîsa şik nîn e ku hemû lehengên hatine vegotin bûne mijara metneke wêjeyî (dîsa ast û hunera kesên ew kirine mijara metna xwe li alikî) serbilindiya neteweya kurd in.
Lê belê, neteweyeke ku demeke dirêj bindest maye gelo bi rastî her tiştê wê neteweyê yê serbilindiyê ye? Îro roj qey her tiştê neteweya kurd serê endamên neteweyê bilind dike?
Bêşik e ku neteweyeke ew qas dem bindest maye bivê nevê di nava wê de aliyên nexweş jî rû dabin; kes, kom, derdor, danûstendin, têkîlî; ango kesayet, kirin û tevgerên nexweş di nava neteweyê de wekî vîrûs derketibin holê!
Jixwe sedema ew qas dem bindest mane jî jê yek ma ne ji nexweşiyên neteweyê ye?
Ta vê demê wêjeya kurdî xwe ji bo vegotina serbilindiyên neteweyê daye bin bêr lê ji bo nexweşiyên neteweyê, lê ji bo aliyên wê yên riziyayî bêhn ketiyî?...
Dem e, piştî honandin û vegotina mijar û lehengên vîtrînê divê nivîskar berê xwe bide nava dîkanê heta kun û qulikên gemarî yên li dawiya dîkanê jî bikudîne; wisa nexweş-î hene ku bo wêjeyê bi dest nakevin…
Em bi xwe di nav de ne, belkî parçeyekî vê yekê ne li ber çavan e; her kirin û her kesê neteweya kurd ma qey pîr û pak e? Qey bindestî-mexdûriyet nelirêtî-qirêjiyên li nav neteweya me peyda bûyînî pak dike?!
Bo behsa wan nexweşiyan dibêm helbest bi têra xwe nixumandiye, çîrok kin e, lê roman; divê ew romana neteweya nexweş îlam bê nivîsandin...
Me divê bûyer, me divê lehengên nexweş, me divê danûstendin û têkîliyên kirêt-nedurist; ca guh bidêrin dema du kurd hatin cem hev li cihekî rûniştin, dê behsa bi sedan nexweşiyên tekakesî-civakî yên li nav neteweya kurd rû dane wê li ber guhê me bikevin!..
.jpg)
