SILÊMANÎ

Kongreya Netewî ya Kurdistanê (KNK) rojên 26-27’ê mehê li bajarê Silêmanî li Otela Highcrest "Şêwra Neteweyî ya Başûrê Kurdistanê" li dar xist. Di şêwrê de zêdeyî 300 kesên nûnerên partî, aliyên siyasî, parlementer, mamosteyên zanko, nûnerên rêxistinên medenî, lêkolîner, kesayetên serbixwe, rewşenbîr, oldarên başûrê Kurdistanê amade bûn. Ji parçeyên din jî nûner beşdarî şêwrê bûn. Di encama nîqaşên du rojan de biryar hatin girtin û ew biryar wekî encamnameya Şêwra Yekîtiya Neteweyî ya Başûrê Kurdistanê hatin eşkerekirin. Vaye xal bi xal ew biryarên hatin girtin:

Ne dijî neteweyên din e
-Kurdên hemû parçeyên Kurdistanê beşeke neteweya kurd in û bi hev re neteweya kurd pêk tînin. Yekîtiya kurdan ji bo vê jî divê miheqeq were kirin. Yekîtiya Netewî ya Kurdan dijberiya tu neteweyek nake û dikare qezenceke mezin ji bo demokratîzekirina Rojhilata Navîn bîne.

Pêdiviya dîplomasiya hevbeş
- Divê em dîplomasiyeke hevbeş ya azadîxwaz ya Kurdistanê pêşbixin û dîplomasiya Kongreya Netewî ya Kurdistanê bibe çavkaniya dîplomasiya hevbeş ya neteweyî.
-Divê stratejiyekî netewî û nîştîmanî ya hevbeş di rojeva me de hebe. Di vê de jî Kurdistaneke azad û demokratîk e ku hemû pêkhateyên Kurdistanê jî bikarin di navê de xweserî û taybetmendiyên xwe bijîn.
-Pêwîstiya gelê kurd ji her demê zêdetir bi hêzeke parastinê ya hevbeş heye û ev jî tê wateya avakirina artêşa hevbeş. Êrîş li ser her pêkhate û parçeyeke Kurdistanê pêk were, wekî êrîşa li dijî tevahî Kurdistanê bizane. Ev jî dikare bi hêzeke parastinê ya hevbeş parastina Kurdistanê bike.

Dijî şerê navxweyî ne
-Em li dijî her cure şerê navxweyî ne. Divê siyaset û îdeolojî jî li gorî formatekî tendûrist be.
-Em êrîşên ser Efrîn û Rojavayê Kurdistanê wekî êrîşa li ser hemû Kurdistanê dizanin. Ji gelê Kurdistanê û raya giştî dixwazin xwedî li Rojavayê Kurdistan derbikevin. Em bi heman awayî piştgirî didin têkoşîna gelê me yê li herêmên nakokî li ser hene yên Başûrê Kurdistanê û dibêjin divê pirsgirêk bi rêyên aştiyane û demokratîk werin çareseri kirin. Her wiha em ew destdirêjiya li ser van herêman bi tundî şermezar dikin.
-Em hemû destdirêjiyên dewleta Îran yên li ser Rojhilatê Kurdistanê şermezar dikin. Em piştgiriya têkoşîna gelê Rojhilat û hemû gelên din yên Îranê dikin. Em ji bo berjewendiyên gelê xwe daxwaz ji aliyên Rojhilatê Kurdistanê dikin ku nêzî hev bibin.
-Em ji bo beşdarbûna hemû xebatan piştgiriya wekheviya jin û zilaman dikin.

Bangek ji bo çapemeniya kurd
-Em ji hemû ragihandinan dixwazin ku li dewsa hizbayetî berjewendiyên neteweyî esas bigirin.
-Em ji hemû beşdarvanên şêwra neteweyî daxwaz dikin ku ji bo van xalên ku hatine destnîşankirin bi berpirsyariyên xwe rabin. Yên ku vê carê beşdar nebûne yan jî nekarîne beşdar bibin jî vedixwînin kongreya netewî ya Kurdistanê ku di dema pêşde biryare were lidar xistin.
-Ew 21 xal û prensîbên KNK'ê ji bo yekîtiya netewî eşkere kiribûn divê her aliyek û kesayetek vê bikin bingeha xebatên xwe û ji bo pêşxistina fikrê demokrasî û netewî bixebitin.
-Em ji hemû rewşenbîr, hizb, alî, akademîsyen û rêxistinên medenî daxwaz dikin ku zêdetir bawerî bi gelê xwe bidin û fikrê neteweyî pêşbixin.
-Em wekî Şêwra Netewî ya Başûrê Kurdistanê silav li berxwedanên zindanan dikin û piştgiriya têkoşîn û xebatên wan dikin.
-Heya Kongreya Netewî ya Kurdistanê jî pêk were wê xebatên bi vî awayî bi şêweyên cuda cuda berdewam bikin û xebatên amadekariyê jî werin meşandin.
-Ji bo pêşxistina yekîtiya netewî ya Kurdistanê roleke girîng dikeve ser milê jin û ciwan û rêxistinên medenî. Di warê pratîkî de jî divê zêdetir bixebitin û hewl bidin peywendiyên navbera rêxistinan de xurttir bikin.
-Divê rêz dayîn a hev a  hemû bawerî, netewe û pêkhateyên li Kurdistanê hebe û zimaneke baş ya bikare bi hev re bidin bistînin pêşbixin.
-Xwepêşandan, nerazîbûnên li hember desthilata herêmî beşereke demokrasiyêye. Her destdirêjiyeke li hember vana pêk were û xwîn were rijandin em şermezar dikin.

Avakirina edaleta civakî
-Avakirina edaleta civakî û dabînkirina jiyana xelk beşeke yekîtiya neteweyiye. Eger beşeke gelê te bê nan û bê xizmetguzarîbe, bêkar û pêşeroj be yekîtiya netewî jî pêk nayê.
-Em wekî Şêwra Yekîtiya Neteweyî ya Başûrê Kurdistanê piştgiriya xebat û têkoşîna rewa ya Bakurê Kurdistanê dikin.