Diyarname
Di maçey Kûpay Cîhanî ya 2018'inan de eyro Rusya û Spanya têdir kay kerdî.
Kûpa Rusya de yena kaykerdin, la favorî Spanya bî. Bi ene favorîbiyiney xo Spanya deqey 12'inan de 1-0 kewte verdî. Sergei Ignashevich goge eyşte qelay xo û gole serê namey Spanya de hamî niştişî. Di deqey 41'yinan de serê namey Nusya de Dzyuba bersiv da û bî 1-1. Nîmew joyîn û diyin bi enî away temam bî. Di 90 deqe de tîmekê nêşka gole berzo û maçe derbasê demo zêde bî. 30 deqew din hame kaykerdişî la reyna rewş nêbedeliya û nawey tîman penaltî eyştî. Di penaltiyan de Rusya bi 4-3 bi ser kewt û Spanya şariwite keye.
Rusya bi enî away derbasî çarîk fînalî bî û serkewteyê maçey Hirvatistan û Danîmarka kam bo go bibo reqîbê Rusya.

Hirvatan jî danîmarkî şirawitî keye
Dimay maçey Rusya û Spanya, maça diyinan ay eyro maçey Hirvatistan û Danîmarka jî derbasê penaltiyan bî.
Maçe bi heyecan dest pa kerde. Serê namey Danîmarka de Jorgensen deqey joyînan de gole eyşte û tîmê xor raver berd: 1-0.
Hirvatan tam 3 deqey dimaran bi Mandzukicî bersiv da û maçe bî 1-1. Erê tenê 4 deqey, di 4 deqan de 2 golî û dimara nê Danîmarka, nê Hirvatan eşka enî skorî bibedelno. 90 deqe, dimara 30 deqey bînî jî bi ene away qediyay. Di demanê zêdekan de Modric nêşka penaltî berzo, egir bieyştêne ga maçe derbasê penaltiyan nêbo la nêşka û maçe derbazê penaltiyan bî. Di penaltiyan de kaykerdoxanê wirdî hetan jî çende hebî nêşkay bikerê gol, la peynî peynî de Hirvatan paştey Danîmarka na erd ro û derbasî çarîk fînalî bî.
Hirvatî di çarîk fînal de go Rusyadir kay bikerê. 

 ***

Ji bo agahiyên berfirehtir fermo rûpela me ya taybet:

- RÛPELA TAYBET A KÛPAYA CÎHANÊ 2018