Îhsan Bîrgul

Haci Bektaşî Velî yê Tirk dibêje "keçan bidin xwendin, lawan bidin ber xebatê(kar)"... 

Çi gava vê gotinê dibihîzim keçên kurd ên xwende û ehlê nivîsê tên bîra min. Ji ber ku ez jî bi ziman û nivîsê re têkildar im, piştî vebûna beşên kurdî yên di zanîngehan de min bi dehan keçên kurd nas kirin. Keçên dildarê ziman û wêjeyê gelê xwe. Ev ji bo min kêfxweşiyeke mezin e.  Çimkî dirûvgirtina civakên pêşketî bi pêşketin û serkeftina jinê ve girêdayî ye... 

Keça bi navê Eylem Akincî jî ji yek wan keçên kurd e. Akincî ji Peyasa navçeya Amedê ye. Ji Zanîngeha Çewligê mezûn bûye. Ji ber ku xwendevana beşa kurdî ye, ji bo qedandina zanîngehê tezek amede kiriye. Tez bi navê "Hin Mînakên Folklorîk Ji Herema Diyarbekirê" ye.

Tez ji çîrok, mamik û gotinên pêşiyan pêk tê. Ji bilî wan gelek agahîyên teknîkî yên di derbarê folklorê de jî di vê tez-pirtûkê de hene. Tez ji hêla Weşanxaneya Jîndan ve wekî pirtûk hatiye çapkirin. 

Her çendî di aliyê teknîkî de gelek kêmasî hebin, nemaze yên weşanxaneyê lê ji bo rojên pêş materyaleke kêrhatî ye. Çimkî çend sal berê wexta me dest bi xebatên ziman kir, herî zêde me zehmetiya materyalan didît. Îro rewş gelek baş e. Bi materyalên wiha dê rojên pêş de baştir bibe. Bi ya min divê hemû xwendekarên beşên kurdî tezên xwe bi hassasiyeta pirtûkê amade bikin, weşanxaneyên kurd jî ji bo çapkirinê alîkar bin... 

Ji pirtûkê çend agahiyên teknîkî; di pirtûkê de çîrokên bi navê: 

- Pepûk 

- Roviya Pîr 

- Mala Kulîlkê 

- Çee 

- Telika Zer 

- Kon 

- Eba Werîs û Telîs 

- Dirîkên Mar 

- Lawê Dîk 

- Riya Xirşlê 

- Nirmir Axa 

- Pilûs 

- Ji Fatê re Tix 

- Dawetên Berê 

- Şewat... hene. 

Her wiha lîstika bi navê Tihoşê heye. Tez ji vegotina çar kesan pêk tê. Sê mêr û jinek.. 

Wekî gotina dawî; bi mirina her kal û pîrê re reheke ziman diçilmise û ziwa dibe. Divê em rê nedin ku ev reh ziwa bin. Li ser vê esasê destxweşiya hêja Eylem Akincî û keçên kurd ên dildarê çand û zimanê xwe dixwazim...