Hedrekerdox: Cemil Oguz
Di serey 2019'inan de rewşê kovaranê kurdî senîn bî? Kamcoy veciyay û çende hûmarî vetî? Bêrê ma têdir bawnê rewşê kovaranê kurdî yê ke Tirkiya û Bakur de çap benê.
VATE
Kovara Vate hîrê aşmî reyke bi kirmanckî weşanê xo kena. Kovara ke seranê 90 de Ewropa de dest bi weşane kerd, dimara hamî Tirkiya û hema jî weşaneş xo dewam kena. Kovare enka hûmara xo ya 62'yinan vete. Kovare emsar 4 hûmarî, hûmarê 59,60,61 û 62'yinan vetî.
ZRÎNG
Zrîng kovara karîkaturî ya. Kovare emsar aşmey 10'inan de dest bi weşaney xo kerde û heta enka hîrê hûmarey vetî. Kovare hem bi kurmancî hem bi kirmanckî weşanê xo kena.
NÛBIHAR
Enka miyanê kurdanê bakurî de kovara tehf temenderg Nûbihar e. Kovara Nûbiharî di serey 1992'yinan de dest bi weşanê xo kerda û heta enka weşanê xo temam kena. Nûbihare ke hîrê aşmî reyke vecêna, re rey erey veciyo jî her hîrê aşmî hûmarêke vecena. Kovare enka hûmarey xo ya 149'inan veta.
DILOP
Kovara Dilop bi kurdî û tirkî weşan kena. Kovare bi îstîkrar her di aşman reyke, serê aşmede vecêna. Kovare enka diseriya û hûmara xo ya 11'inan aşma şî vete.
KUND
Kovara Kund her çar aşmî reyke vecêna û xetey weşanê ay serê kitab, huner û çandî de wa. Kovara di serey xo ya diyinan de 6 hûmarey çap kerdê. Hûmara xo ya peyîne zey aşmanê "îlon-cotmeh-mijdar-berfanbar" vete.
ZIRYAB
Ziryab miyanê kurdan de tekane kovara serê muzîkî de weşane kena. Ziryab çar aşmî reyke vecêna. Kovare di 8 aşmanê verînan de 2 hûmarey xo vetî la eno payîz hema qe nêveciyawa.
FÊRNAME
Fêrname hetê Komeleya Lêkolînanê Kurdî ra yena vetişî. Kovara ke armanc kerd bî 4 aşman reyke veciyo la emsar tenî hûmarêke veta.
KURT TARÎHÎ
"Kurt Tarîh" (Dîroka Kurdan) bi tirkî weşan kerdêne la eno serêke zêdeyêriyo jî di her hûmarey xo de ca dano jo-di nişteyanê bi kurdî jî. Loma a zî miyanê ene dosyay ma de ca girota. Kovara "Kurd Tarîhî" bi pergal hîrê aşmî reyke vecêna û enka hûmarey xo ya 38'inan vete.
NÛBIHAR AKADEMÎ
Nûbihar Akademî kovarêke akademîk e, ke hetê Nûbiharî ra yena vetişî. Kovara ke kena 6 aşman reyke veciyo la emsar tenê hûmarêke, a jî eno payîz vete.
PSYCHOLOGY KURDÎ
Kovara "Psychology Kurdî" serê derûnî de weşane kena. Kovara ke çar aşmî reyke vecêna emsar eşkana tenî di hûmaran veco. Hûmarey xo ya 8'inan di çar aşmanê verînan, ya 9'inan jî zey hûmara "gulan-hezîran-tîrmeh-tebax" vete la henî erey veta.
FOLKLORA ME
Kovara Folklora Me hetê Weqfey Mezopotamya ra yena hedrekerdin û vetişî. Kovare serê folklorê kurdan de weşaney xo dewam kena û hîrê aşman reyke vecêna. Kovare emsar dest bi weşaney xo kerde û qeybî aşmanê "îlon-çiriya pêşîn, çiriya paşîn" hûmarey xo ya 3'yinan vete.
FLASHHILAT
"Flashhilat" nê kovare, zey "fanzîn"e weşaney xo dewam kena. Fanzîna ke serê fotografî de bi kurdî weşane kena heta enka aşmera reyke bi pergal veciyawa. Flashhilatî di ene aşmey 12'nan de hûmara xo ya newî, ya 11'inan vete bî. Fanzîna ku Riha de veciyayne, enka ra pey go Amed de weşanê xo dewam bikero.
Not: Hetî kovarê hetê zanîngehar ra hamey çapkerdişî ma nêgirotê miyanê ene xebere. Weko bîn ger ma namey henî kovaran kerdibê xo vîra û jo xebere bido ma, ma go ro xebere zêde bikerê.
**
Nûçeyên Kategoriya 2019'an :
- 2019: Wîkîpedîa li Tirkiyeyê hê jî qedexe ye
- 2019: Pirtûkên kurdî yên çapa diduyan kirine
- 2019: 10 belgefîlmên serketî yên 10 salên dawî
- 2019: Welatên ku ji aliyê jinan ve têne birêvebirin
- 2019: Weyangeriya kurdî saleke çawa li dû xwe hişt?
- 2019: FIFA'yê rêza tîmên neteweyî eşkere kir
.jpg)
.jpg)
