Diyarname

Weşanxaneya Na ku dest bi weşandina pirtûkên felsefeyê kiriye wekî gava yekemîn pirtûka Alî Gurdîlî “Ferhenga Felsefeyê” weşand.

‘Ferhenga Felsefeyê’ (Dictionary of Philosophy, Felsefe Sozlugu) bi çapeke taybet derket. Di ferhengê de li dor 1100 têgihên felsefî, feylesof û felsefeya fîlozofan hatine nasandin û di dawiya nasandina têgihan de têgihên bi zimanê îngilîzî, fransî û tirkî hatine nivîsandin. Li gor gotina weşanxaneyê ev nêzî 20 salan e Gurdîlî li ser vê xebatê disekine. Weşanxaneya Na ku berê li ser êzdayetî, avestalojî pirtûk derxistibûn, niha beşa felsefeyê li ser vê zêde kiriye û di vê gavê de wisa gotiye: “Wekî Weşanxaneya Na’ê em jê bawer in ku felsefe jî, yek ji wan nirx û çalakiyên mirovî yê dema me ye û ne kêmtirê zanist, wêje û hunerê ye. Loma jî, me biryar daye ku em piştgirîya kar û xebatên felsefeya kurdî bikin. Xebatên koma felsefevanên kurdîziman, bi diruşma ‘felsefe, bi kurdî xweş e’ di bîr û raya kurdî de tê zanîn û hêjayî gotinê ye ku gelek kesen di komê de cih girtine, xizmeteke baş kirine ji bo çand û zimanê kurdî. Mijar û xebatên derbarê felsefeyê de, hêja ne ku meriv piştgirîya wan bike, bixwîne û bide xwendin.”

NA’yê eşkere kiriye ku ew amadekariya çapkirina seta felsefeye jî dikin ji bo di demekê nêz de çap bikin û bi vî hawî jî, bikaribin xizmeta çand û zimanê kurdî bikin.

Alî Gurdîlî kî ye?

Alî Gurdilî, civaknas û felsefevan e. Di sala 1966’an de li gundê Gurdilana Misirca Sêrtê hatiye dinê. Piştî ku di sala 1980’yan de bi hemû malbata xwe re koçê bajarê Îzmîrê dibe li Zanîngeha Egeyê dest bi xwendinê dike û beşa civaknasiyê û wê beşê dixwîne. Nêzîkê pazdeh sal in hewl dide ku di hinek warên zanistî û felsefî de bixebite. Heta niha gelek gotarên wî ên zanistî û felsefî di kovarên wekî Kovara W, Tîroj û Xwenas, Felsefevan û Ajdayê de hatine çapkirin. Niha li Tirkiyeyê dijî, mamostetiya beşa felsefeyê dike û bavê du zarokan e. Berpirsiyar û edîtorê malper û Kovara  Felsefevan e. 

Pirtûkên wî:

1- Dengê Felsefeyê, Weşanên Doz, Rêbendan 2006

2- Rewîtiyeke Zanistî, Weşanên Doz, Gulan 2007

3- Jiyan û Felsefeya Mensûrê Hallac ‘Enel Heq’, Weşanên Evrensel. 

Stenbol 2015

4- Destpêka Felsefeyê, Weşanên Soran, 2015

5- Antolojiya Feylesofan, Weşanên Soran, 2015 

-  Ferhenga Felsefeyê / Alî Gurdîlî / Weşanên Na / 529 rûpel / Ferheng / 2021