Diyarname
“Defter” yekemîn pirtûka helbestan a helbestvan Elîxan Loran e ku ji aliyê Weşanxaneya Lîsê ve hate weşandin!

Helbestkar û edîtor Elîxan Loran ku di sala 1984’an de li Dêrika Çiyayê Mazî hatiye dinê heta niha hin helbestên wî di kovaran de hatibûn weşandin û niha pirtûka wî ya helbesten gihîşt ber destê xwendevanan.
“Defter”a Elîxan Loran a ku bi navên “Def” û “ter” li ser du beşan dabeş dibe û her wekî Îşev Peyv e, Peyveron e, Evdozinar, Jihevketinên Baro, Hey teacher! Leave writing alone! û Defter, 28 helbestan bi xwe ve digire
“Defter”a Elîxan Loran, hem bi kurdiya xwe ya xwedî hêz û şiyan ve, ku dide per û baskên xwe û li esmanê zimên bilind difire, lê tu carî nizm nakeve, hem jî bi şêwaza xwe ya poetîk ve, ku bi her awayî bê dudilî û kurt û xwerû bi kurmancî ranêzîkî mijarên xwe dibe, çavkaniyên xwe yên herêmî û gerdûnî yên ku “helbesta helbest” jê dizê baş nas dike. Her wiha wekî helbestkarekî xort û nûhatî, Elîxan Loran reh û serekaniyên zimanê kurdî pirr baş nas dike û hemû derfetên zimên ên helbestî di helbestên xwe de li ser asteke pirr bilind bi kar tîne. Gava ku mirov bala xwe dide Elîxan Loranê ku di serê helbesteke xwe de dibêje, “Werîsê min warîsê min e…”, bi dest xwe re ji mirov ve xuya dibe ku Elîxan Loran “sêhrbazekî kurmancî yê xort” e.
Li gel vê yekê, Elîxan Loran di gelek helbestên xwe de silavê dide helbestkarine kurd û cîhanê û bi vê yeka xwe ve jî, bi sercema Deftera xwe ve dibe xelekeke wêjeyî û li zincîreya dîwanên bi kurdî zêde dibe.
Vaye helbestek ji Defterê:

Xerabo

Kêlikeke nefsbiçûk im li ber serê zemên
- Kêlîkinan bi dirrikên daran jî dişêwirim –
Ligel ku cînavk jî hene
Dişêm biêşim ku li şûna navan mexel nayên

Kela sewtê bi te nakeve, Xerabo!
Strana te daxwaza pireke hilweşandî ye
Mayîna aviya kulîlkê bû, tu helikiyî pê re
Tu yê mezin bibî bi siya xwe ya kitim re

Hilî! –dormo dormo û bi fermanî-
Ji ber berga temenê xwe
Ba dê bihata hê
Beriya ewrên avî
Li pêşberî galegalên
Li av û royê çûyî

Dil Qabîlê dil e!

Defter / Elîxan Loran / Helbest / 64 rûpel