Diyarname

Nivîskarê navdar, ê xelatgirê Xelata Nobelê ya Wêjeyê, nivîskarê ji Kolombiyayê Gabriel Garcia Marquez tam 10 sal berê mir û piştî mirina wî bi 10 salan romana wî ya nû bi navê "Emê di Gelawêjê de Hev Bibînin" derket. Ma piştî nivîskar bimire dikare romanê binivîse? Va ye çîroka meseleyê:

Berî 10 salan ew bi nexweşiya demansê ketibû. Dihat dermankirin. Ber xwe dida. Lê di heman demê de jî nivîsandina xwe dom dikir. Wê çaxê romana xwe ya dawî nivîsî, navê "Emê di Gelawêjê de Hev Bibînin" lê kir. Lê di heman demê de wesiyet li zarokên xwe kir; "Piştî ez mirin romanê tune bikin." Lê kurên wî wesiyata bavê xwe bi cih neaînin. Piştî 10 salan ew ji bo çapê amade kirin û pirtûk belav bû.

Pirtûk hefteya borî bi spanyolî derket û roja 12'yê adarê jî li hemû dinyayê hat belavkirin.

Roman çîroka pîrejineke bi navê Ana Magdalena Bachorta a ku her sal di meha gelawêjê (tebaxê) de ji bo serdana gora diya xwe bi tena serê xwe diçe giravekê û her çend zêdeyî 20 sal in di nav zewiceke dilşad de be jî di her rêwîtiyê de evîndarek nû li xwe zêde dike, vedibêje.

'NEHATA WEŞANDIN DÊ NÎVCO BIMANA'

Di nûçeya rojnameya The Guardianê (8 adar) de zarokên wî Rodrigo û Gonzalo Garcia gotine ku baweriya wan pê ew e ku roman gelek serketiye loma wan biryara weşandinê daye û wisa gotine, "Ji îxanetê wêdetir me zewqê xwendevan girt berî her tiştî. Ger xwendevan ji bo vê dilşad bibin wê çaxê mimkûn e ku Gabo me efû bike. Baweriya me bi vê heye."

Li aliê din kurê wî Ganzalo Garcia diyar kiriye ku heta niha di dîroka wêjeyê de gelek caran hatiye xwestin ku destxet bêne tunekirin û gotiye, "Wekî şexs ji bo min mesele ev e; ev parçeya dawî ya Gabo ye, loma ez rehet im. Ger ev nehata weşandin dê hemû berhemên wî nîvco bimana. Ji bilî vê di nav kaxizan de tu romaneke wî ya hatibe veşartin tune ye."

Li Tirkiyeyê weşanên Canê pirtûk bi navê "Agustosta Goruşuruz" li tirkî wergerand û çap kir.