Diyarname
Pirtûka nivîskar Abdullah Ongullu Şêrwî bi navê "Aşê Dînan" ji Weşanên Aryenê derket.

Pirtûk bi navê "Aşê Dînan, pêkenok, hîcw" hatiye amadekirin û çapkirin. Di pirtûkê de pêkenokên gelêrî, pêkenokên Melayê Meşhûr û pêkenokên zindanan hene. 
Nivîskar Abdullah Orgullu Şêrwî li ser vê pirtûkê gelek xebitiye, berî wan pêşkêş bike pêşekek dirêj nivîsiye û dibêje, "Pêkenok ne tenê pêkenok in, çiqas pêkenok bin ew qas jî fikirandinok in, ew qas lêpirsînok, rexnekirinok û ew qas tolhildanok in. Pêkenok ne tiştekî wisa ji rêzê ne ku mirov tenê pê bikene û derbas bibe. Pêkenok karekî micîd e. Li hemberî pergalên tarî, li hemberî kesên tarî, ehmeq û xayînan çeka herî bi bandor in."

'ÇÎROK ZIMANÊ KURDAN Ê DUYEMÎN E'
Nivîskarê ku ev 30 sal in girtiye, li zindanê gelek pirtûk amade kirine ku ev a niha li ber dest jî yek ji wan e. Li gor gotina wî ew gelek qîmetê dide ziman û dibêje, "Kurd bi çîrokê difikire. Çîrok bi her kêliyê jiyana kurdan ve hatiye nexşandin. Çîrok vebîra (hafize) kurdan e, ew keleh e ku çand, ziman û kevneşopiyen wan diparêze. Çîrok zimanê kurdan ê duyemîn e. Dibistana wan jî çîrok in. Xwe bi çîrokan tînin ziman. Ji ber vê jî tiştekî jêneger e. Ziman bi wêjeyê pêş dikeve. Çiqas pirtûk werin nivîsandin, ziman ewqas xurt dibe. Bi vê mebestê min zor da xwe ku bi kurdî binivîsim."

'MALA REŞ Û DIRÊJ'
Pirtûk ji sê beşan pêk tê. Beşa yekem "Aşê Dînan" e ku têde 67 pêkenok cih digirin. Di vê beşê de pêkenokên ji nav civakê hene. Yek ji wan bi vî rengî ye:
"Rojekê Hesoyê koçer kerê xwe dide pêşiya xwe û diçe bajêr, kerê bi vagona trênê ve girê dide û diçe sûkê, çiqas pereyên wî hene pê helawê dikire. Dema dizivire tê dinêre ku kerê wî ne li wê derê ye. Ji xelkê derdorê dipirse û dibêje, "Li vê derê malek reş û dirêj hebû min kerê xwe pê ve girêdabû, gelo ew mal çi pê hat?"
Di beşa duyem de ku bi sernavê "Melayê Meşhûr" hatiye pêşkêşkirin de 22 pêkenok hene. Va ye yek ji wan:
"Merek pêkenokekê bi awayekî pir nexweş dibêje, ji xeynî Melayê Meşhûr tu kes nakene. Ji mela re dibêjin:
"Gelo tu çima keniyayî? Te dît ku pêkenok ne bi awayekî ku mirov pê bikenê ye."
Melayê Meşhûr dibêje, "
"Ji ber ku ditirsiyam wê carek din jî bibêje."

PÊKENOKÊN ZINDANÊ
Û di beşa sêyem "Pêkenokên zindanê" de jî 21 pêkenok hene. Yên di vê beşê de tiştên li zindanê qewimîne, ew pê keniyane hatine bi cih kirin. Yek ji wan bi vî rengî ye:
"Hevalê Çiya baş bi kurdî nizane. Bi tirkî difikire û bi kurdî dibêje. Rojekê pêlava wî nexuyaye. Digere nagere nabîne. Divê herhal hevalekî biriye. Tê hewşa menzelê û ji hevalan wiha dipirse: 'Hevalko gelo kê pêlava min xistiye xwe?'".

ABDULLAH ONGULLU ŞÊRWÎ KÎ YE?
Nivîskar Abdullah Ongullu Şêrwî di sala 1974'an de li gundê Zivzîkê ya bi ser Şêrwana Sêrtê ve hatiye dinê. Dibistana seretayî li gund, navîn û lîse jî li deverên din xwendiye. Di sala 1994'an de li Dêrsimê di pevçûnek de bi birîndarî tê girtin û cezayê muebetê lê dibirin. Piştî 30 salên girtîmayînê vê mehê tê berdan.
Pirtûkên wî yên hatine weşandin ev in:
- Jiyan, Weşanên Ar, Çîrok, 2020
- Keça Mendê, Weşanên Ar, 2021, Çîrok
- Bêhna Rihanê Naçe, Weşanên Ar, 2022, Helbest