Diyarname
Pirtûka Kamiran Elî Bedirxan “Dersên Şerîetê” û wergera kurdî ya “Hedîsên Cenabê Pêxember” ku di Hawarê de çap kiribû bi hev re ji Weşanên Avesta wekî pirtûkek hatin çapkirin.

Bi vê kitêbê du berhemên Kamiran Alî Bedirxan yên bi navê Dersên Şerîetê û Hedîsên Cenabê Pêxember ji nû ve hatin weşandin. Pirtûk bi amadekariya Mesûd Serfiraz ji bo çapê hatiye amadekirin.

Dersên Şerîetê, di sala 1938’an de li Şamê di nav rêza Kitêbxana Hawarê de bi hejmara 12’an hatiye çapkirin. Berhem bi kurmanciyeke zelal û bi awayekî sivik şertên îmanê û îslamê rave dike. Bedirxan, di benda dawî ya vê berhemê de şîreteke kurdewarî li zarokan dike ku ew pêşî ji Xwedê û pêxember pişt re jî ji welat û miletê xwe hez bikin, emrê Xwedê pêk bînin lê ji aliyekî ve jî ji bo milet û welatê xwe bixebitin û qet hêviyên xwe ji Xwedê qut nekin.

Kamiran Elî Bedirxan, di hejmara 27’an a Hawarê de bi sernavê Hedîsên Cenabê Pêxember dest bi weşandina wergera hedîsan kiriye. Heta hejmara 47’an bi giştî 702 hedîs bi kurdî wergerandiye û weşandiye. Mijarên hedîsên ku hatine weşandin cur bi cur in lê piranî di der barê meseleyên civakî de ne; wekî jin, aborî, arîkariya feqîran, têkiliyên civakî bi taybetî yên cîranan û hwd.

Dersên Şerîetê - Hedîsên Cenabê Pêxember /Kamiran alî Bedirxan / Amadekar: Mesûd Serfiraz / 104 rûpel