Diyarname
Mebûsê Blokê yê Amedê, siyasetmedarê kurd û Serokê KADEP'ê Şerafettin Elçi ku ev demeke dirêj bû ji ber qansêrê dihat dermankirin îro wefat kir.

Elçi ku ev demekê bû li Nexweşxaneyeke li Enqereyê dihat dermankirin îro saet 18.40'î de ji ber pişikê û kêm nefesgirtinê dilê wî nexebitî û wefat kir.

Sibê (26'ê mehê) piştî nîvro dê cenazeya Elçî teslîmî malbat û dostên wî bê kirin.

Siyasetmedarê kurd, mebûsê Amedê Şerafettin Elçî di 14'ê adara 1938'an de li Cizîra Şirnexê hat dinê. Wî dibistana seretayî û nvîn li Cizîrê, lîse li mêrdinê xwend û derbasî Beşa Hiqûqê ya Zanîngeha Enqereyê bû. Piştî xilaskirina zanîngehê li Amedê staja xwe ya parêzerî kir. Şerafettin Elçi ku demekê li Cizîrê parêzerê kir, di dema Derbeya 12'yê Adarê ew tevî hevalên xwe ji doza PDK-T'yê di Dadgeha Leşkerî ya Amedê de hat darizandin û 8 mehan li girtîgeha leşkerî ma.

Elçî di sala 1977'an de ji Mêrdinê wekî mebûs hat hilibjartin û di salên 78 û 79'an de Wezîriya Bayindirlixê kir lê ji ber ku got "Li Tirkiyeyê kurd hene, ez jî kurd im" ji aliyê Dadgeha Rewşa Awarte ya Enqereyê ve hat darizandin û bi 2 sal û 3 meh cezayê hepsê hat cezakirin. Dîsa bi îdîaya "di dema wezîriya xwe de kar daye hin kurdan" li Dîwana Bilind hat darizandin, bi 2 sal û 4 mehan hat cezakirin. Ji ber van cezayan li dor 30 mehan li girtîgehê ma; bi qasî 10 salan jî siyaset li wî hat qedexekirin.

Di sala 1992'yan de wî û hin rewşenbîrên kurd Weqfa Azadî û Mafên Kurdan vekir, ev weqif di sala 1995'an de bi navê Kurt-Kavê bi awayekî fermî hat pejirandin. Di dîroka Komara Tirkiyeyê de ev yekemîn sazî bû ku bi navê "Kurd" dihat qebûlkirin.

Siyasetmedar Elçi di sala 1994'an de digel hin hevalên xwe Platforma Demokratîk a Kurd ava kir û wî jî berdevkiya platformê kir. Di 3'yê rêbendana 1997'an de Demokratip Kitle Partisî vekir û ew bû serokê partiyê. Lê ev partî di 26'ê reşemiya 1999'an de hat girtin.

Paşê wî KADEP (19 berfanbar 2006) vekir û ew bû Serokê Giştî yê KADEP'ê. Di hilbijartina 12'yê pûşpera 2011'an de ew jî beşdarî Bloka Ked, Aştî û Demokrasiyê bû (ku BDP'ê jî di nav blokê de bû) û ji Amedê wekî mebûsê serbixwe hat hilbijartin. Elçî zewicandî û bavê 7 zarokan bû.