COLEMÊRG

Li navçeya Gevera Culemêrgê di merasima cenazeyên Mehmet Reşît Îşbîlîr (35) û biraziyê wî Veysel Îşbîlîr (34) de polîsan dîsa bi çekan mudaxaleyî girsê kir û di mudaxaleyê de ketober gule berdan hewayê. Di mudaxaleyê de Mustafa Topçu (31) ji serê xwe ve bi girani birîndar bû. Topçu rakirin Nexweşxaneya Dewletê ya Geverê.

Duh li Geverê koma ku êrîşa li dijî gorên gerîlayên HPG'ê şermezar kirin, rastî êrîşa polîsan hatibûn. Di mudaxaleya polîsan a bi çekdarî de welatiyên bi navê Mehmet Reşît Îşbîlîr (35) û biraziyê wî Veysel Îşbîlîr (34) bi guleya polîsan hatibûn kuştin. Duh cenazeyên wan şandin Saziya Tipa Edlî ya Wanê. 

Cenazeyên Mehmet Reşît Îşbîlîr û Veysel Îşbîlîr îro anîn Geverê. Cenaze li ser kolana Cengiz Topelê ji aliyê 10 hezaran kesan ve hat pêşwazîkirin. Polîsan li vir mudaxaleyî girsê kir û pevçûn derket. Di mudaxaleya polîsan de Welatiyê bi navê Mustafa Topçu ê 31 salî ji serê xwe bi giranî birîndar bû û rakirin Nexweşxaneya Dewletê ya Geverê. 

Di merasimê de Hevserokê Giştî yê BDP'ê Selahattin Demirtaş, Hevseroka Giştî ya HDP'ê Sebahat Tuncel, parlamenterên BDP'ê jî amade bûn. Girseya ku piştî cenaze ji Mizgeftê girtin darbest danîn ser milê xwe û meşiyan Goristana Bajirgeyê.

Piştî definkirina cenazeyê Hevserokê Giştî yê BDP'ê Selahattin Demîrtaş axafî. Piştî axaftinê girsê dîsa ber bi navçeyê ve meşiya. Di meşê de polîsan  bi bombeyên gazê û ava şid mudaxaleyî girseyê kir. Di mudaxaleyê de welatiyê 31 salî Mustafa Topçu ji serê xwe birîndar bû. Topçu rakirin Nexweşxaneya Dewletê ya Geverê.

Li gelek bajar û navçeyan çalakiyên şermezarkirinê

Li Stenbolê ji bo şermezarkirina kuştina her du kurdan li ber Lîseya Galatasaraya Beyogluya Stenbolê gel hat ba hev û çalakî li dar xist. Piştî çalakiyê girseya ku xwest bimeşe polîsan nehişt û di navbera wan de xirecir derket. 

Her wiha li Culemêrg, Mûş, Îdir, Varto, Ercîş, Başqale, Şemzînan, Çelê, Bûlaniş û Silopiyê jî çalakiya şermezarkirinê li dar ket.