Amed
Ji bo Roja Zimanê Kurdî li Amedê resepsiyoneke li dar ket. Berendama serbixwe ya Amedê Leyla Zana di resepsiyonê de wisa got: "Divê em xwe ji zimanê asîmîlasyonê dûr bikîn. Divê dayik, mamosta û hunermendên me li ser ziman bisekinin da ku civak bikare xwe li ser piyan bigire."

Ev çend sal in kurd 15'ê Gulanê wekî Roja Zimanê Kurdî pîroz dikin. Ji bo vê yekê li Navenda Çanda Cegerxwîn resepsiyonek hat dayîn. Salona resepsiyonê bi pankart û flamayên têkildarî cejna ziman hat xemilandin. Resepsiyon ji aliyê Kurdî-Dera Amedê ve bi tevlîbûna berendamên serbixwe yên Bloka Ked, Demokrasî û Azadiyê yên Amedê, Altan Tan, Leyla Zana, Emine Ayna û Nursel Aydogan, Şaredarê Bajarê Mezin yê Amedê Osman Baydemîr, Şaredarê Sûrê Abdullah Demîrbaş, mamostayên Kurdî-Derê, xwendekarên Kurdî-Derê û her wiha gelek kesan hate lidarxistin.

Di despêkê de ji bo kesên ku di têkoşîna azadiyê de jiyana xwe ji dest dane, deqeyek rêz hat girtin û piştre sînevîzyona li ser ziman hat nîşandayîn û axaftin hatin kirin.
Axaftina despêkê Serokê Kurdî Derê Burhan Zorooglu kir û got ku ew îro bi xemgînî cejna zimanê kurdî pîroz dikîn; ji ber ku dîsa cenazeyên ciwanan bi ser wan de tên.

Zorooglu diyar kir ku ziman rihê gelan e û tu kes nikare bê ziman, nasname û çand bijî.

Serokê Kurdî Derê Zorooglu destnîşan kir îsal bi şîara "Zimanê me hebûna me ye" Cejna Zimanê Kurdî pîroz dikin.

Piştre berendama serbixwe ya Amedê Leyla Zana axivî, di destpêkê de Cejna Ziman Kurdî li hemû kesî pîroz kir û got ku divê roja ziman bibe roja kêfxweşiyê.
Zana, bi lêv kir ku lazim e hemû kes di derdora ziman de bê cem hev û nakokiyên navxweyî ji holê bên rakirin.

Zana wiha domand: "Pirsgirêka me ya herî mezin ew e ku di nav civakê kes zêde li zimanê kurdî xwedî dernayê. Em dibêjîn; îro zimanê me nayê axaftin rast e. Divê em xwe ji zimanê asîmîlasyonê dûr bigirin. Divê dayik, mamosta û hunermendên me li ser ziman bisekinin da ku civak bikare xwe li ser piyan bigire. Divê em zimanê xwe wekî îbadetê fêrî zarokên xwe bikin.”

Piştî axaftinan xelatên ziman ji aliyê KURDÎ DER'ê ve hatin dayîn û resepsiyon bi dawî bû