Diyarname
Metnên 4’emîn Konferasa Parastin û Perwerdehiya Kurdî wekî pirtûk hatin çapkirin.

Di navbera 16-19’ê sermawezê de Şaredariya Bajarê Mezin a Amedê 4’emîn Rojên Wêjeyê li dar xist. Di nav van rojên wêjeyê de di navbera 18-19’ê sermawezê de konferanseke ziman bi navê 4’emîn Konferansa Parastin û Perwerdehiya Kurdî li dar xist.
Li dor 150 nivîskar û rewşenbîrên kurd beşdarî konferansê bûn, nîqaş kirin, fikrên xwe yên li ser parastin û perwerdehiya kurdî anîn ziman. Di konferansê de kesên wekî Oriol Ampuero i Gonzalvez, Necat Ayaz, Berzo Mehmûd, Rêzan Tovjîn, Ezîzê Cewo, Zana Farqînî, Mustafa Barak, Çerkezê Reş, Izet F. Yehya, Denîz Gunduz, Alî Çîftçî, Can Hessen, Dr. Necmeddîn Cebarî gotarên xwe pêşkêşkirin. Ev gotar niha bi navê “Konferansa Parastin û Perwerdehiya Kurdî” wekî pirtûk hatin çapkirin. Pirtûka ku ji Weşanên Şaredariya Bajarê Mezin a Amedê derket de bê pere tê belavkirin.

Di pirtûka ku edîtoriya wê Samî Tan û Davut Ozalp kiriye de axaftina destpêka konferansê ya Şaredarê Bajarê Mezin ê Amedê Osman Baydemîr û pêşeka Samî Tan jî cih girtiye. Her wiha ji bilî gotaran axaftinên ku di konferansê de hatin kirin jî di pirtûkê de hatine bi cih kirin. Yek ji tiştên ku di konferansê de hat kirin jî sazkirina koman bû. Komên ku di çarçoveya konferansê de li ser ziman xebitîn û metneke amade kirin, ew metnê wan jî tevî encamnameya konferansê di pirtûkê de hatiye bi cih kirin.

Di pirtûkê de 14 gotar hene û ev gotar piranî bi kurmancî ne ku di konferansê de jî bi vî awayî hatibûn pêşkêş kirin. Di nav van de gotara Oriol Ampuero i Gonzalvez ku bi îngilîzî pêşkêş kiribû wergera wê ya kurmancî di pirtûkê de hatiye weşandin. Her wiha gotara Edîtorê Weşanên Vate Deniz Gunguz a bi zazakî û gotara Hîndekarê Zanîngeha Sîne Dr. Necmeddîn Cebarî jî bi soranî ku di konferansê de jî bi vî awayî pêşkêş kiribû wekî orjînala xwe di pirtûkê de hatin pêşkêş kirin.

Axaftina Baydemîr a ku di pirtûkê de cih girtiye de Baydemir wisa dibêje: “Di vê konferansê de jî hûn ê pirs û pirsgirêkên vî zimanî nîqaş bikin. Hûn ê bi fikr û ramanên ji hev û din hêjatir metodên dermankirina kul û birînên vî zimanê birîndar, vî zimanê ku heta niha hatiye înkarkirin nîşan bidin. Ez hêvî dikim ku ev konferans di dermankirina birînên vî zimanê qedîm de bibe gavek.”

Samî Tan jî bi van gotinan hêviyên xwe yên li ser pirtûkê tîne ziman: “Em hêvî dikin ku dê ev pirtûk bi kêrî kesên ku li ser zimanê kurdî xebatê dikin, nemaze jî aktîvîst û têkoşerên parastin û pêşvebirina zimanê kurdî were.”

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.