Diyarname

Rênas Jiyan gotarên xwe di bin navê "Ji Şevê re / çend gotinên dera hanê" de di pirtûkekê de civand. Gotar rexne-ceribandinî ne.

Pirtûk ceribandin-rexneyê ji Weşanên Belkî derketiye û 295 rûpel e. Di pirtûkê de gotarên nivîskar Rênas Jiyan ên ku heta niha di berhemên cur bi cur de hatine weşandin cih digirin.
Gotar di bin sernavên "Li ser civakê", "Li ser hunerê" Û "Li ser têgehê", li gor naveroka wan hatine bi cih kirin.
Di yên civakî de fikrên Rênas Jiyan ên li ser civakê, di yên hunerî de li ser hunerê û di yên têgehan de jî  li ser vê beşê fikir û raman hatine gotin. Yek ji têgeheke yan jî bîr û bariyeke ku Rênas Jiyan li ser disekine, li dû diçe, yan jî dixwaze mirov li dû biçinjî 'çirûskîzm' e û gotara "Çirûskîzm" jî di pirtûkê de cih digire. Jiyan li ser 'Çirûskîzm'a ku di heman demê de wekî bîrdoziyekê nêzî dibe wisa dibêje: "Çirûskîzm, krîzek e; krîzeke çarmîxî ye. Ji tesîra narkotîk a peyvan diafire, lê bi dû re, piştî asta zîldayina zimên a herî jor, piştî hebûna bêqisûr vediguhere asta objebûnê û krîstalîze dibe. (...) Di lîteraturê û her wiha di hunerê de çirûskîzm; binavkirin, bimahnekirin, bitahm, bireng û bibêhnkirina îmajên ji şecereya binhişînê an jî ji şecereya binê bîrê ava dibe. Ji bo ev bîr karibe bi firê bikeve; çirûskîzm bi komplîkasyona du baskan hewce ye, baskê pratîkê ku ev bask lîteratur-huner e û baskê teoriyê ku ev jî paradîgma û stratejiya ekolê ye."
Jiyan di gotarên xwe de tiştinên din jî dide nîqaşkirin. Mînak ji bo Ehmedê Xanî dibêje, 'Ew ne fîlozof e' û nîqaşê dide dest pê kirin, li ser "Cegerxwîn û metaforî" disekine, 'dewlet û ziman'ê nîqaş dide, mijara 'kurdbûn dikare bibe îdeolojî yan na?'yê davêje holê.
Ji bo van û ji bo gelek dîtin û rexneyên din pirtûka "Ji şevê re" di pirtûkxaneyan de cihê xwe girt.

Rênas Jiyan kî ye?

Nivîskar Rênas Jiyan di sala 1974'an de li Qosera Mêrdînê hatiye dinê. Zanîngeha Dîcleyê Fakulteya Perwerdehiyê xelas kiriye. Pirtûka wî ya yekem wekî helbest bi navê "Janya" derket û ji aliyê xwendevanan ve gelek hat ecibandin. Rênas Jiyan bi vê pirtûkê di nav helbestvaniya kurdan de ji xwe re ciheke baş çêkir. Dûre pirtûkên wî yên bi navê "Mexzena xwînê" (helbest) û "Di tuwaletê de" (şano) derketin. Rênas Jiyan niha niha edîtoriya Weşanên Belkî û kovara Çirûskê ku çar mehan carekê dertê dike. "Ji şevê re" pirtûka wî ya çaran e.

***

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.