Diyarname
Pirtûka nivîskar Yaşar Eroglu a bi navê "Qevdek Sosretî" ji Weşanên Aramê derket.

"Qevdek Sosretî" ya nivîskar Eroglu ji nivîsên wî yên ku di salên 2007-08'an de di malper û rojnameyan de hatine weşandin pêk tê.
Nivîskar Eroglu nivîsên xwe li ser bûyerên ku li nav civakê diqewimin bi zimanekî îronî saz kirine û weşandine. Pirtûk bi zimanê îronî xwendevanan di nav dad û darizandin û lêpirsînên hêzên ewlekarî, dozgerî û dageriya dewleta tirk a li dijî gel û pêşengên gelê kurd qewimîne de digerîne, bûyerên pêk hatine hem careke din bi wan dide bîranîn, hem jî bi zimanê xwe wan dibişirîne. Dîsa bûyera teqîna mayînê ku dozger teqînê davêje ser Îranê, qereqol davêje ser eşîran û tiştên bi vî rengî ji Eroglu re bûne mijar.

Nivîskar Eroglu li ser vê pirtûka xwe wisa dibêje: "Min piranî terzê îronî bikar anî. Sêra îroniyê heye. Gavên kin davêje, dirêj demeşe. Dijî dide xwarin don vedireşîne. Reş nîşan dide, spî vedişêrîne. Îronî nebûya lêpirsîna ji bo Barzanî wekî bûyereke ji rêzê dima, kesê ku xwendin û nivîsandina wî tune ye bi propagandaya li ser înternetê ve hatiye sûcdarkirin zêde bal nedikişand. Min xwest ku ez nûçeyên giran bi mîzahê ve barên wan sivik bikim lê fikirandina li ser wan giran bikim da ku di serên xwendevanan de pirseke mayînde bimîne. Nizanim çêbû yan na! Ew jî maye ser eleqeya xwendevanan."

"Qewdek Sosretî" duyemîn pirtûka Yaşar Eroglu ye. Pirtûka yekemîn a Eroglu di sala 2005'an de bi navê "Nahêlin em bigihîjine bihara xwe" ji Weşanên Aramê derketibû. Di vê pirtûkê de jî Eroglu 15 çîrok pêşkêşî xwendevanan kiribû.

Qevdek Sosretî / Yaşar Eroglu / Weşanên Aram / Mîzah / 128 rûpel