Diyarname

Nivîskar Amed Çeko Jiyan romaneke nû nivîsand û roman ji Weşanên J&J'yê derket. Li aliyê din pirtûka Jiyan "Berbang jî şahid e" bi çapa xwe ya nû derket.

'BERXÊ NÊR'

Li nav kurdan gotina 'Berxê nêr ji bo kêrê ye' navdar e. Romanê navê xwe jî ji vê gotinê girtiye. Karakterê romanê kesekî bi navê Berxo ye. Berxo yê ji gundekî çiyayî (û xeyalî) yê Misircê wekî gelek xortên xortên kurdan berê xwe dide Marmarîsa bajarê turîzmê. Armanca Berxo bi çûna Marmarîsê ne kar û xebat lê kêf û tolazî ye, lê piştî ku xebera şewitandina gundê wan digihîje wî, ew biryarê dide ku “stûyê xwe bide ber kêrê” (?). Roman berê xwendevanan dide serdemek ku gund dihatin şewitandin, zor û zordariyên leşker û cerdevanan ên li ser kurdan, ji aliyê din ve berê xwe dide jiyana “nifşê xêrjixwenedîtî”. 

'BERBANG JÎ ŞAHID E'

Pirtûka din a Amed Çeko Jiyan "Berbang jî Şahid e" ku bi çapa xwe ya diduyan ji Weşanên J&J'yê derket, yekem car di sala 2014'an de çap bûbû. Di vê pirtûkê de de kuştinên Hizbullahê yên li dijî sivîlan bi şahidiyên karakterên sade derketibû pêşberî xwendevanan.

Her du pirtûk jî şahidiya serdemek, şahidiya salên 90'î ku kurd di nav zehmetiyeke mezin de bûn dikin.

Wekî notek: Weşanên J&J beşdarî Fûara Pirtûkan a Amedê dibe. Yên bixwazin dikarin pirtûkan ji standa J&J'yê bi dest bixin.

Amed Çeko Jiyan kî ye?

Amed Çeko Jiyan di sala 1980'yî de li Misircê hatiye dinê. Jiyan piştî dibistanên pêşî, Zanîngeha Elezîzê li Beşa Mamostetiya Karên Metalî xwendiye, lê ji ber sedemên cuda zanîngeh kuta nekiriye. Wî, di nav damezrandina Koma PCKurdê de cih girtiye, di serî de Mozilla Firefox, gelek bernameyên komputerê wî (ligel hevalên xwe) wergerandine kurmancî. 

Wî, di Azadiya Welat de edîtorî kiriye. Ji ber dozên lê hatine vekirin berê xwe daye Ewropayê.

Pirtûkên wî yên ku derketine ev in:

- "Varjabed" (kurteçîrok, Weşanên Lîs, 2010)

- "Welcome to Amed, Rêbera Axaftinê" (Weşanên Şaredariya Bajarê Mezin a Amedê, 2010)

- "Berbang jî Şahid e" (Çîrok, Weşanên J&J, 2014).

- Berxê Nêr (Roman, Weşanên J&J, 2023)

***   

Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.  

- twitter.com/diyarname1
- facebook.com/diyarname
- instagram.com/diyarname1

- youtube.com/diyarnamediyarname