Diyarname
Weşanên Lîs pirtûka Ebdurrehman Qasimlo ya dîrokî "Kurdistan û Kurd, Lêkolîneke Siyasî û Aborî" çap kir.

Di çarçoveya bernameya weşanê ya 2012’an de Weşanên Lîs pirtûka Dr. Evbdurrehman Qasimlo ya bi navê "Kurdistan û Kurd, Lêkolîneke Siyasî û Aborî" weşand. Kurmanciya pirtûkê ji aliyê Ziya Avci ve hatiye amadekirin.

Pirtûka "Kurdistan û Kurd – Lêkolîneke Siyasî û Aborî" heştemîn pirtûka Lîsê ya rêza bi navê "Lêkolînên Kurdewar" ku Qasimlo ev pirtûk li ser rewşa kurdan a siyasî û aboriya Kurdistanê ya berî sala 1965’an nivîsandiye ku di vî warî yek ji çavkaniyên sereke ye. 

Qasimlo wisa qala amadekirin û weşandina vê pirtûkê dike: “Min bi pêşniyarkirina hevalekî, di sala 1957’an de dest bi nivîsîna pirtûkê kir û pirtûk di sala 1962’yan de ji bo çapê amade bû.”

Pirtûk cara pêşî bi çekî hatiye nivîsîn, lê çapa wê ya yekemîn bi slovakî di sala 1964’an de hatiye kirin. Paşê li Pragê û li Londonê du çapên pirtûkê yên bi îngilîzî hatine kirin û çapa pirtûkê ya bi erebî jî ji wergera îngilîzî hatiye kirin. Paşê pirtûk li gelek welatan bi zimanên wekî tirkî, polonî, kurdî (kurmancî û soranî) derketiye. Pirtûka niha bi amadekariya kurmanciya wê ya ji aliyê Ziya Avci ve ji Lîsê derket.

Nivîskar Qasimlo bi hûrgilî li ser rewşa aborî û siyasî ya her parçeyekî Kurdistanê rawestiyaye û daneyên balkêş pêşkêş kirine. Nivîskar mijarên wekî çem, deryaçe, daristan û xwezaya Kurdistanê, serjimar, dîn, ziman û wêje, xwendina kurdan, dîroka Kurdistanê ya kevn û nêzîk, dabeşbûna Kurdistanê û encamên dabeşbûnê, pêwendiyên kurdan li gel cîranên wan, siyaseta serdestên Kurdistanê, têkoşîn û serhildanên kurdan, li her parçeyî, ji her aliyî ve rewşa kurdan, xwedîkirina pez û dewaran, cotkarî, çandinî, li Kurdistanê dîroka milkiyetê, milkiyeta axê, nîvekarî, hilberana petrolê û berawirdkirina petrola Kurdistanê li gel a welatên cîhanê û gelek babetên din têr û tijî û bi hûrgilî rave dike û pêşkêş dike.

Dr. Ebdurrehman Qasimlo, di 22’yê berfanbara sala 1930’yî de, di malbateke dewlemend û navdar de, li bajarê Ûrmiyeyê ji dayîk bûye.
Qasimlo, roja 13’ê pûşpera sala 1989’an, dema ku berdevkên Komara Îslamî ya Îranê pê re muzakere dikirin, ji aliyê yek ji berdevkên Komara Îslamî ya Îranê ve, tevî du hevalên xwe hat kuştin.

Kurdistan û Kurd – Lêkolîneke Siyasî û Aborî / Ebdurrehman Qasimlo / Lêanîna ji Soranî: Ziya Avci / Lêkolîn / 293 rûpel