Diyarname
Du pirtûkên din ên nivîskar Medenî Ferho derketin. Pirtûk bi navê "Destegul" û "Dora bacinê bi dar e" ji Weşanên Do derketin.

"Dora bacinê bi dar e"

"Dora bacinê bi dar e" romaneke nivîskar Medenî Ferho ye. Pirtûk di sala 2007'an de ji Weşanên Tevn derketibû, niha bi çapeke nû derket pêşkêşî xwendevanên kurd.

Medenî Ferho yek ji nivîskarên kurd e ku xwedî tûrikek mezin a ji peyvên kurdî ye. Ew vî tûrikî di pirtûkên xwe de bikar tîne, gelek caran jî xwendevan têde winda dibe û ji vê jî aciz dibe. Ferho di vê pirtûkê de jî ew tûrikê peyvên xwe bikar aniye lê bi awayekî çîrokî roman rêstiye. Ji vî alî ve dikare bê gotin ku roman herikbar e jî.
Roman qala çîroka Gundê Bacinê dike ku çîroka wê ev sed sal in, sed û pêncî sal in di rengê birakujiyê de didome. Birakujî heye, lê di heman demê de hewara aştiyê daketiye...
"Dora bacinê bi dar e" bi zimanê xwe yê çîrokî, bi vegotineke herikbar we gazî nav çîrokê dike.

"Destegul"

Nivîskar Medenî Ferho di nav nivîskariya kurdî de qet wekî helbestvan nehatiye nasîn. Lê ev nayê wê wateyê ku ew dê helbestan nenivîse. û helbest dest avetiye pênûsê helbestên xwe rêz kirine; hinek li ser jiyanê, hinek li ser dem û dewranê.
Belê Ferho bi "Destegul"ê helbestên xwe pêşkêşî xwendevanan dike.
vaye yek ji wan:
"Gotin û agir

Agir
Û gotin
Wek şûrê destik şimşîr
Û bi xunafa hestênr min semaxkirî
Di nava şevên giran de
Dadikevin meydana cengê

Bi kulîlkên şewatê re
Top û meterilyozên dagirkeriyê dikujin
Piştre wek zarokên şermok
Straneke bêdeng dilorînin

Agir
Û gotin
Tirsê dikujin
Û wek baraneke Nîsanê
Di bax û bîstanê dilan de dibarin
Yek dibe niyaz
Yek dibe amîn"

Nivîskar Medenî Ferho helbestên xwe di bin beşên bi sernavê "Destegula rêberekî", "Deryayek dilmarês" û "Bilbil û dilteqîn" pêşkêş kirine.

***