Diyarname
Helbestvan Kawa Nemir vê carê pirtûka xwe ya helbestan a nû bi navê “Bêdengî û Tiştên Din” derxist. Pirtûka ku ji Weşanên Lîs derketiye helbestên nû yên Kawa Nemir têde cih digirin.

Bêdengî û Tiştên Din, çaremîn pirtûka helbestan a Kawa Nemirê helbestkarê pirtûkên helbestan ên bi navê “Selpakfiroş” (Rewşen-Name, 2003), “Bîşenga Deşta Dûr” (Lîs, 2006) û “Salname” (Lîs, 2009) û nivîskarê pirtûka kurteçîrokan a bi navê “Çavdêriyên Barbarekî” (Lîs, 2009) ye. Her wiha Nemir heta pirtûkên helbestvanên wekî William Butler Yeats, Walt Whitman, T. S. Eliot, Ezra Pound, T. E. Hulme, William Shakespeare û Emily Dickinson wergerandine kurdî.
Kawa Nemir ku wekî helbestvan, wergêr û edîtorekî kar û barê xwe yên nivîsê didomîne, di warê helbestê di nav helbesta kurdî de xwedî ciheke taybet e. Nemir di vê qadê de heta niha bi wergera nêzî 6 hezar helbestan û nivîsandina gelek metnên din cihê xwe qewîm kiriye û xebatên xwe yên di wanê nivîsê, bi taybetî jî helbestê de didomîne. “Bêdengî û Tiştên Din” jî xebata wî ya dawî ye ku di vî warî de derketiye
Kawa Nemir, li gorî ku her helbesteke tê de ji xwe re cî peyda kirî dihêle ku xwendevan hest pê bike, ji bo helbesta Kawa Nemir bi xwe werçerxek û çivangehek e, ku nîşaneyan dide wekî helbestkar ê di derîne di vê pirtûkê de vekirî hiştî re derbas bibe û di pirtûkên xwe yên bê de xwe li helbestine dirêjtir û zimanzehmettir biceribîne. Helbesta ku ji vê pirtûkê re bûye nav;   

Bêdengî û Tiştên Din

Weku ji nava mija rohn de biaxive,
“Ji te çûyîna min dê odeya kuna aramiyê
bihêle ji te re,” gotibû wî.

Lê jinik şewla manolyayê ye, maye
li berseriya nivînê ku nivistiye maye.
Perde dikişine deryaya ku bi kulan dixulxule.

“Wa ye wiha dişuxule siya deryagerê min,
ê çavşîn, li qorziyên gewdeyê min ê şûm.”

Li hundirê koşka ku li banê wê dixwîne bûm.

Ji vê helbestê jî diyar e ku Kawa Nemir hê jî bi giranî bi mijareke xwe ya sereke berdewam e, bi her helbesteke xwe re, bi dengekî aram, lê bi nedîbariya xwe ve hêl û bilind, “tiştên din” di gerdûna fireh de li “bêdengî”yê zêde dike.

Bêdengî û Tiştên Din/ Kawa Nemir / Helbest / 110 rûpel