DiyarName.Com

27'ê mehê, agahiyên li ser Rojava..

...Ev tê nûkirin...

Mazlum Ebdî û Şara çi axivîn?
Çapemeniya nêzî hikumeta Sûriyeyê ragihand ku Şamê û HSD'ê li ser bajarên kurdan li hev kirineke nû çêkiriye.
Îro Serfermandarê HSD'ê Mazlum Ebdî çûbû Şamê. HSD'ê di vî warî de hê daxuyaniyeke fermî belav nekiriye. Lê çapemeniya Şamê dibêje, gava yekem rawestandina hemû şer e, xala din jî ew e kontrola Hesekê, Qamişlo û herêmên din radestî ewlehiya hundirîn tê kirin. Qest ji vê ev e hêzên asayişê yên kurd wê li nav bajaran bin. Tê gotin HSD wê derkeve derveyî bajaran.
Çapemenî dibêje ji bo entegrasyona HSD'ê li hevkirineke bingehîn heye.
Serfermandarê HSD'ê Mazlum Ebdî roja 25'ê mehê di bernameyeke taybet a Ronahî TV de gotibû, "Li gor îtîfaqê divê Artêşa Sûrî nekeve herêmên kurdan.Hêzên ewlekariya hundir û hêzên dewleta Sûrî bi hev re wê li ser vê bisekinin. Artêşa Sûrî pêwîste derveyî herêmê be."

SENAROT GHARAMÎ BO KURDAN BANGA EREBISTANA SIÛDÎ KIR
Senatorê DYA'yê Lindsey Graham di peyameke din ku belav kir de banga Erebistana Siûdî kir. Grahamî wisa got, "Welatê we ji bo têkiliyeke baş ligel DYA'yê û herêmê çêbike ez gelek xebitîm. Ez hurmetdarê gelek guherînan im. Lê di dema ku hikumeta Sûriyeyê êrîşê kurdan dike de divê ev bêdengiya we ya ji bo vê yekê biguhere. Ji kerema xwe re fêm bikin, ez dizanim bandora Erebistana Siûdî li ser hikumeta Sûriyeyê heye û ji bo herêm hê zêdetir bikeve nava kaosê ez li bendê me ku hûn vê bandora xwe bikar bînin."

Senator Graham ji bo kurdan wê qanûnek pêşniyar bike

Senator Lindsey Graham li ser rûpela xwe ya X'ê diyar kir ku "Terikandina kurdan ku hevalbendê sereke ya têkbirina xîlafeta DAIŞ'ê bûn, dê ji bo nav û dengê Dewletên Yekbûyî yên Amerîkayê (DYA) û berjewendiyên wê yên ewlehiya neteweyî keraset be."

Graham destnîşan kir ku ew ê vê hefteyê "qanûnek pêşkêş bike ku cezayên tund li ser hikumet an komek ku beşdarî kiryarên dijminane li dijî kurdan dibe, ferz bike".

Graham wisa got, "Ez bawerim her du partî wê piştgiriya Zagona Rizgarkirina Kurdan bikin û ev zagon wê bi bandor be."

Rêveberiya Xweser: Daxuyaniyên navneteweyî bêyî gavên pratîkî têrê nakin
Rêveberiya Xweseriya Demokratîk a Herêma Bakur û Rojhilatê Sûriyeyê hewldanên ji bo agirbesta mayînde pêşwazî kir, diyar kir ku daxuyaniyên navneteweyî bêyî gavên pratîkî têrê nakin. Rêveberiyê silav li berxwedana gel û hêzên parastina xakê jî kir.
Rêveberî di daxuyaniya xwe de wisa got, "Em Rêveberiya Xweseriya Demokratîk a Herêma Bakur û Rojhilatê Sûriyeyê tişta ku di daxuyaniya Amerekî–Ewropî de der barê dirêjkirina agirbesta li Bakur û Rojhilatê Sûriyeyê, pabendbûna bi agirbestê, piştgiriya aramiyê, parastina korîdorên mirovî û ji nû ve destpêkirina xizmetguzariyên bingehîn bi taybet li bajarê Kobaîê de, şopand. Di dema ku gelê me rastî êrîş û binpêkirinan tê de, tenê dayîna daxuyaniyan bêyî tu tedbîrên piratîkî ji bo rawestandina wan, têrê nake. Ev yek van daxuyaniyan ji asta helwestan derbas nake. Di dema ku dorpêçeke giran li ser bajarê Kobanî didome de, herêmên ewle her tim rastî êrîşên berdewam tên û ev yek gefan li jiyana sivîlan û astengkirina aramiyê, dixwe."
Rêveberî ji dewletan xwestiye ku helwestên cidî û berpirsiyariyê bigirin" û wisa gotiye, "Ji zimanê daxuyaniyan ber bi gavên pratîkî ve biçin ku parastina gelê me garantî bikin, êrîşan rawestînin, dorpêçê rakin û gihandina bê asteng a alîkariyên mirovî misoger bikin."
*
ALÎKARÎ
Neteweyên Yekbûyî (NY) 30 kamyonên alîkariyê gihandin Kantona Cizîrê
Xaça Sor 5 kamyonên alîkariyê gihandin Kobanî.
Li Başûr xebatên berhevkarina alîkariyê didomin. Ji gelek aliyan ve komakirin û şandina wan a Rojava didome. Li gor hin agahiyan Weqfa Xêrxaziya Barzanî îro 80 tir alîkarî şandine Rojava.
*

DYA, Brîntanya, Fransa û Almanyayê li ser Rojava daxuyanî da

Wezîrê Karên Derve yê Fransayê Jean-Noel Barrot, Wezîra Karên Derve ya Brîtanyayê Yvette Cooper, Cîgira Wezîrê Karên Derve ya Almanyayê Serap Guler û Nûnerê Taybet ê Amerîkayê yê Kar û Barên Sûriyeyê Tom Barrack piştî civînê bi hev re daxuyanî dan û xwestin agirbestê heyî mayînde be.

Li gor nûçeya Ronahî TV aliyan xwestiye her du alî li maseya danûstandinan vegerin da ku entegrasyona Bakur û Rojhilatê Sûriyê bi rengekî aştiyane pêk were û mafên hemû welatiyan li gor Peymana 18’ê Rêbendanê werin parastin.
Di nûçeyê de hatiye gotin ku vekirina korîdorên mirovî erênî ye û divê hemû alî sivîlan biparêzin û bêyî bend alîkarî bighêje Kobanî.

Dewletan wisa gotiye, "Aramiya Bakur û Rojhilatê Sûriyê tişta sereke ye bo rêgirtina li ber vegera terorê û xurtkirina aramiya herêmî ye."

Di heman daxuyaniyê de spasiya rola hevkarên xwe Iraq, Hikumeta Herêma Kurdistanê, Hikumeta Sûriyê û Hêzên Sûriya Demokratîk di warê rêgirtina li ber DAIŞ’ê de kiriye û wiha hatiye gotin, "Bila valahiyek ewlehiyê li dor deverên girtina DAIŞ’ê çênebe û li ser wê yekê. Divê civîneke bi lez a Koalîsyona Navneteweyî were lidarxistin."
*

Heyeta ji Başûr li Rojava axivî: Armanca êrişan li ser Rojava dorfireh e
Heyeta ji Başûr roja 25'ê mehê çû Rojava. Serokê Tevgera Helwest a Nîştîmanî ya Kurdistanê û parlamenter Elî Hemê Salih Taha, parlamenter Bedel Ebdulbaqî Berwarî û endamên Tevgera Helwest Mihemed Ebdurehman Yunis, Mihemed Ebdurehman, Ebdulsemet Selam Ebdulla, Arî Bedel Ebdulbaqî, Zeman Xelîl Îbrahîm di nav heyetê de ne. Ev du roj in ew li Rojava ne. Îro wan ligel PYD'ê hevdîtin kir. Hevserokê PYD'ê Xerîb Hiso pêşwazî li wan kir.
Piştî hevdîtinê li ser navê heyetê Serokê Tevgera Helwest a Nîştîmanî ya Kurdistanê û Parlamenter Elî Hemê Salih Taha axivî: "Em çend roj li welatê xwe Rojava ne, li nava kes û karên xwe ne. Me bi hevalên xwe re hinek goftogo kirin. Em dixwazin hinek xalên girîng bînin ziman. Ev şer dozek netewî ye. Ji derveyî hewldana dagirkeriya xaka kurdan tiştek din nîn e. Tiştê ku êşê dide me, me dît ku em ne tenê li hemberî artêşekî sazûmanî şer dikin, em li hemberî komek hêzên bê ser û ber, bi karanîna ol ji bo qetilkirina gel, bi karanîna ol ji bo dizîna malê gel, ji bo koçberkirina gel in şer dikin. Ji destpêka şer heta niha ku ji Helebê dest pê kir zêdetirî 2 hezar kes winda ne, ev sûcekî pir mezin e. Gelek malbat hene ku di dema koçberbûnê de zarok û jin girtine kuştine û avêtine nava av û baxçeyan."
Taha got ku heta niha tu bajarên kurdan neketiye destê van hêzan û wiha dom kir, "Ya çêbûyî xwe ji cihên ku piranî ereb bûne. Ji bo ku şerek di navbera kurd-ereban de çênebe hêzê xwe kişandiye."
Parlamenter Elî Hemê Salih Taha got ku divê em berxwedana xwe bidomînin, çîroka kuştinan ji cîhanê re bêjin û got, "Me dît ku armanca vê hêzê ne tenê Rojava ye. Bawer bikin ku eger ev serkevin li Rojava nasekinin. Armanca wan Başûr e, Iraq e û armanca wan mezintir e. Ji bo wê divê Iraq û Herêma Kurdistanê vê baş fêm bikin ku fêm kirine jî. Azadkirina DAIŞ'iyan û hewldana zindîkirina wan, êrişên li ser gelê kurd, ew bi kîn difikirin ku kurdan ew kirine girtîgehê. Ev pir xeternak e, divê dewletên navnetewî li ser rawestin. Xala dawî ev e, divê em tevayî rêyên dîplomasiyê bixin tevgerê. Bi taybet li Ewropa û Amerîka."
Hevdîtinên heyetê li Rojava didomin.
*

HUNERMEND WÊ HERIN ROJAVA
Hat ragihandin ku komek hunermek wekî heyetek wê herin Rojava.
Hunermendên Hozan Diyar, Hozan Şemdîn û Jala Rojhilat îro ji bo piştgiriya bi berxwedana Rojava re ji Almanyayê çûn Silêmanî. Hunermend Necmeddîn Xulamî, Nasir Rezazî û Bilind Brahîm ew pêşwazî kirin. Li gor biryarê hunermend wê bi Serokê YNK'ê Bafil Talabanî, rayedarên Herêma Kurdistana Federe û Wezareta Rewşenbîrî re hevdîtinan bike. Paşê jî wê wekî heyetek here Rojava.
Hê ne diyar e çend hunermend wekî heyet wê herin Rojava lê navên diyar bûne niha ev in: Diyar Dêrsimî, Şemdîn, Jala, Nasir Rezazî, Bilind Brahîm

*

Platforma Tenduristyê: Şer pirsgirêka tenduristî ye derman jî aştî ye
Endamên Platforma Tenduristiyê ya Amedê li ber Nexweşxaneya Egitim-Araştirya ya Gazî hatin ba hev. Tenduristkaran parkarta "Em ji bo mafê jiyanê nobeta jiyanê digirin" vekirin û gotin: “Şer pirsgirêka tenduristî ye derman jî aştî ye.”
Li ser navê platformê Endama Yekîtiya Bijîşkan a Tirk (TTB) Sabîre Aygun daxuyanî bi kurmancî xwend. Wiha hat gotin; "Ev mirin, careke din nîşan didin ku di şer de her dem pêşî zarok, kal, û nexweş berdelê herî giran didin. Şer pirsgirêkeke tenduristiya gel e. Tedawiya wê aşitî ye. Şer tenê bi gule û bombeyan jiyanê tehdit nake; bi tîbûn, xwarin, bi nexweşiyên belav dibin, bi astengkirina gihiştina xizmetên tenduristî, trawmayên derûnî û xizaniyê jî jiyanê dixe bin xetereyê.”
Platformê xwest ji bo Kobanî û hemû Rojava korîdoreke mirovî ya bi ewle bê vekirin.
*

Dayikên Aştiyê çûn ber deriyê Balyozxaneya Îsraîlê
Dayikên Aştiyê îro çûn ber deriyê Konsolosxaneya Îsraîlê ya li Stenbolê û banga piştgiriya Rojava kirin.
Dayikan li ber balyozxaneyê diruşmên "Bijî berxwedana Rojava”, “Jin, jîyan, azadî” û “Ji şer re na, aştî hema niha" bilind kirin. Dayikan got, "EM bang li DYA, Îsraîl û hemû dinyayê dikin bila zarokên me neyên kuştin. Korîdorek bo Kobanî bê vekirin."
Dayikên Aştiyê duh jî li ber Balyozxaneya Îngilistanê ya li Beyogluyê bûn.

*
ÇALAKIYÊN JI BO ROJAVA

DIHÊ
Endam û rêveberên DEM Partî û DBP'ê yên Dihêya Sêrtê li ber avahiyên xwe yên ku li hemam cihî ne kom bûn û ji bo Rojava çalakî li dar xistin.

RÛBAROK
Platfomra Saziyên Demokratîk a Culemêrgê û rêxistina DEM Partî ya Şemzînanê li navçeya Rûbarokê ya Culemêrgê hatin ba hev. Girseyê banga piştgiriya Rojava kir.

NOBETA ROJAVA
Bi pêşengtiya Platforma Saziyên Demokratîk a Amedê li Deriyê Çiyê li Qada Şêx Seîd duh Nobeta Rojava hatibû girtin. Îro noteba wan dom kir. Rêveberên DEM Partî û MED TUHAD-FED'ê çûn serdana nobetê.

Hin nûçeyên eleqedar:

- Senator Graham li ser kurdan dîsa Trump hişyar kir

* 26'ê mehê, agahiyên li ser Rojava...

- 1'ê Reşemî wekî 'Roja Rojava ya Dinyayê' hat ragihandin

- Mazlum Ebdî: Hevdîtin didomin, Artêş wê nekeve Herêmên Kurdan

- 25'ê mehê, agahiyên li ser Rojava

- Şaredariyên DEM Partî: Ji bo Rojava em hemû derfetên xwe seferber dikin

-- 24'ê mehê, agahiyên li ser Rojava

- Heyva Sor a Kurd ji bo rakirina dorpêça li ser Kobanî banga lezgîn kir

- Koma Berxwedan bi stran û peyaman piştgiriyê dide Rojava

-- 23'yê mehê agahiyên li ser Rojava

- 70 rexistinên li Ewropayê banga piştgiriya ji bo Rojava kir

-- 22'yê mehê agahiyên li ser Rojava yên derketine pêş...