DiyarName.Com

3'yê mehê, agahiyên li ser Rojava...

...ev tê nûkirin...

Bakirhan: Tiştên Bahçeli gotin daxwazên me ne jî, bila desthilatdarî pêk bîne
Hevserokê Giştî yê DEM Partiyê Tuncer Bakirhan îro di Civîna Koma DEM Partî ya li Meclisê de axivî.
Va ne çend gotinên wî:
- Peyman bi keda Ocalan di navbera Rêveberiya Xweser û Hikumeta Demkî ya Sûriyê de pêk hatiye.
- Şerê ku dihat xwestin di navbera kurd û ereban de bê kûrkirin, sekiniye. Ger îo di navbera kurd û ereban de şerek tune be, ev yek bi saya serê Birêz Ocalan e. Ger îro mafên gelê kurd hatibin qebûlkirin ev bi saya serê Ocalan e.
- Rojava reşika çavên kurdan e. Gelê kurd rihê yekîtiya neteweyî derxistiye astek ku tu carî ne gihiştiyê. Peywirek mezin dikeve ser milê siyasetmedaran ku vê hişmendiyê vegerînin îradeyek siyasî. Dem dema ku li dijî sepandina koletiya 100 salan serxistina têkoşîna azadiyê ya 100 salan e.
- Êdî tu hincet nemane. Desthilatdarî divê demildest gavên ji bo mafên nasname, çand û ziman nas dikin, demokrasiya herêmî bi hêz dikin, biavêje.
- Li gor gotina Serokê MHP'ê Devlet Bahçelî ku gotibû "Anadolu divê bigihêj hizûrê, Ocalan hêviyê, Ahmet bigihîjin şaredariyên xwe û Demirtaş jî vegere mala xwe. Li ser van biryara me zelal e", Bakirhan: Ev xal gelek girîng e. Em jî van diparêzin. Birêz Bahçelî şirîkê desthilatdariyê ye. Di vê meseleyê de muxatab desthilatdarî ye. Ez hêvî dikim ev tiştên birêz Bahçelî anîn ziman pêk bên. Kayûm betal bibin hevşaredar vegerin peywira xwe. Hevserokê me Selahattin Demirtaş, Figen Yuksekdag û di serî de yên ji ber Doza Kobanî ya wekî kêmînê hatine girtin û hemû siyasî bêne berdan.

*

SOZDER: PARASTINA ROJAVA PARASTINA AMED, HEWLER MEHABADÊ YE
Komeleya Lêkolînên Çand, Dîrok û Wêjeya Devkî – SOZDER, ku navenda wê li Dêrika Çiyayê Mazî ya Mêrdînê ye, îro li ser Rojava daxuyanî da çapemeniyê.
Di daxuyaniyê de, SOZDER’ê bal kişand ser geşedanên dawî yên li rojavayê Kurdistanê. Komeleyê ragihand ku rewşa heyî li Rojava ne tenê qeyraneke herêmî ye, rûbirûbûneke dîrokî ya “hebûn û tunebûnê” ya gelê kurd e. Komeleyê êrîşên li dijî destkeftiyên Şoreşa Rojava wekî êrîşên rasterast li ser hebûn, rûmet û mafên rewa yên neteweya kurd bin av kir û du xalên sereke anî ziman:
- Parastina Rojava, parastina Amedê, Hewlêrê û Mehabadê ye.
- Parastina destkeftiyên Rojava, parastina hêviya hemû parçeyên Kurdistanê ye.

*

'Rojava çavkaniya yekîtiyê ye'
PEN'a Kurd, Komeleya Wêjekarên Kurd û YEW Kurdê li ser Rojava daxuyaniyeke hevbeş belav kir û got, "Rojva çavkaniya yekîtiyê ye."
Saziyan di daxuyaniyê de bang li nivîskar, hunermend û raya giştî ya navneteweyî kirin ku li dijî êrîşan bibin yek deng.
Di daxuyaniyê de hate destnîşankirin ku rewşa îro li Rojava diqewime, rûbirûbûneke dîrokî ya “hebûn û tunebûnê” ye.
Her sê saziyan got ku parastina rûmeta neteweyî tenê bi yekîtiyê mimkûn e û wisa got: “Dîrokê gelek caran nîşanî me daye ku perçebûn, têkçûn û binketina herî mezin e. Heta ku em wek netewe nebin yek deng û yek helwest, em ê di nav bahozên siyasî yên Rojhilata Navîn de her tim bêparastin û bêstatu bimînin.Yekîtiya me, ne tenê daxwaziyek e; ji bo parastina rûmet û axa me, mecbûriyeteke dîrokî ye.””
Di dawî de wisa hat gotin, “Rojava Rojhilat e, Kurdistan yek welat e!”
*

RAPOR: 842 kes hatin binçavkirin, 106 kesî şîdet dît, 118 kes hatin girtin
Navenda Giştî ya OHD'ê (Ozgurluk İçin Hukukçular Dernegi - Komeleya Hiqûqnasan a Ji bo Azadiyê) li ser çalakiyên ji bo Rojava hatine çêkirin raporek amade kir. Rapor li OHD'ya Amedê ji bo çapemenî hat belavkirin. Yek ji rêveberên Navenda Giştî ya OHD'ê Mehmet Oner rapor xwend.
Rapor rojên ji serê salê heta 2'yê vê mehê ve, yanê mehek digire nava xwe.
Li gor raporê di mehek ku çalakî ji bo Rojava hatine li dar xistin de bi giştî 842 kes hatine binçavkirin. 106 kes hatine îşkence û şîdetê li wan hatiye kirin û her wiha 118 kes jî hatine girtin û ew avêtine hepsê.
*

DAYIKÊN AŞTIYÊ: SONDA ME KEZÎZERÊN ME NE
Dayikên Aştiyê li gelek bajarên kurdan û li Tirkiyeyê ji bo Rojava derketine qadan.
Dayik li Mêrdîn, Wan, Riha, Şirnex, Batman, Îzmîr, Stenbolê derketin qadan û daxuyanî dan. Dayikan li her derê pankarta "Sonda me kezîzerên me ne, Rojava rûmeta me ye” vekirin û daxwaza piştgiriya ji bo Rojava anîn ziman.
*

26 Saziyan: Bila mafên kurdan li gor peymanên navneteweyî bê qebûlkirin
Li Mûşê 26 saziyên sivîl li Baroya Mûşê li ser Rojava û helwesta Tirkiyeyê daxuyanî dan çapemeniyê. Daxuyanî ji aliyê Serokê Baroya Mûşê Kadîr Karaçelîk ve hat xwendin. Di daxuyaniyê de bal kişand ser binpêkirinên mafan ên ji aliyê HTŞ'ê ve û li aliyê rexne li Tirkiyeyê jî kir ku di vî warî de ji bo xwişk-birayên me yên wir ên kurd tu gav neavêtiye. Di daxuyaniyê de xwestin şerawestina li Rojava mayînde bibe, mafên kurdan li gor hiqûqa gerdûnî û peymanên navneteweyî bê parastin, Tirkiye bila gelê me yê bira biparêze, korîdora mirovî veke, li hemberî binpêkirina mafan saziyên darazên yên navneteweyî bixe nava helwdanê.